ބުޅާ މަސް ބޭނުންކޮށްގެން ކާބޯތަކެތި ތައްޔާރުކޮށް ވިއްކާ ކަމަށް ތުހުމަތު ކުރެވޭ ބަންގްލަދޭޝްމީހާ އިމިގްރޭޝަނާ ހަވާލުކޮށްފިއެވެ.
ބަންގްލަދޭޝްގެ އަރްފަތު ހޮސައިން ނަމަކަށް މިޔާ 32 އަހަރުގެ މީހާ ފުލުހުން ހައްޔަރު ކުރީ އިއްޔެ ހަވީރުއެވެ. އޭނާ ހައްޔަރުކުރެވުނީ ސެލޫނަކަށް ވަދެ ހުއްޓައެވެ.
ފުލުހުން މީޑިއާއަށް މިއަދު ފޮނުވި މެސެޖެއްގައި ބުނެފައިވަނީ، އަރްފަތު އިއްޔެ އިމިގްރޭޝަނާ ހަވާލުކޮށްފައިވާ ކަމަށާއި، މައްސަލައިގެ ތަޙްޤީޤު ކުރިއަށްދާ ކަމަށެވެ.
މި މައްސަލަ އެންމެ ފުރަތަމަ ސަމާލުކަމަށް އައީ މީސްމީޑިއާގައެވެ. އޭނާގެ މައުލޫމާތު އެންމެ ފުރަތަމަ ހާމަކުރީ "ފެލިން ވެލްފެއާ އޯގަނައިޒޭޝަން" ނަމުގައި 'އެކްސް' ގައި ހަދާފައިވާ އެކައުންޓަކުން. މި އެކައުންޓުން ބުނެފައިވަނީ އަރްފަތަކީ ގަވާއިދާ ޚިލާފަށް އުޅޭ ބިދޭސީއެއް ކަމަށާއި، އޭނާ ބުޅާ މަސް ބޭނުންކޮށްގެން ކާބޯތަކެތި އުފައްދަމުންދާ ކަމަށެވެ.
އިމިގްރޭޝަނުން އަރްފަތު ހޯދުމަށް އާންމުކޮށް އިޢުލާނުކުރީ މިދިޔަ ހޯމަ ދުވަހުއެވެ. އަދި ހަމަ އެ ދުވަހު، ގަވާއިދާ ޚިލާފަށް އުޅެމުންދިޔަ އިތުރު ފަސް ބިދޭސީން ވެސް އިމިގްރޭޝަންގެ ބެލުމުގެ ދަށަށް ގެންދެވުނެވެ.
