ފަލަސްޠީނުގެ ރައްޔިތުންނަށް އެހީވުމަށް ރާއްޖޭގައި ބޭއްވި ޓެލެތޯނެއްގައި ޖަމާކުރެވުނު 19 މިލިއަން ރުފިޔާ ސަރުކާރުން ޔޫ.އެން ރިލީފް އެންޑް ވަރކްސް އޭޖެންސީ ފޯރ ޕެލެސްޓައިން ރެފިއުޖީސް އިން ދަ ނިއަރ އީސްޓް (ޔޫ.އެން.އާރް.ޑަބްލިއު.އޭ) އަށް ޙަވާލުކޮށްފިއެވެ.

"ފަލަސްޠީނާއެކު ދިވެހިން" މި ޝިޢާރުގެ ދަށުން ބޭއްވުނު މި ޓެލެތޯނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެދިވަޑައިގަތުމުގެ މަތިން ޕަބްލިކް ސަރވިސް މީޑިއާ (ޕީ.އެސް.އެމް) އިން އެހެނިހެން މީޑިއާތަކާ ގުޅިގެން އިންތިޒާމުކުރި ޓެލެތޯނެކެވެ.

ޖޫން މަހު ބޭއްވުނު މި ޓެލެތޯނުގައި 19،309،468.02 ރުފިޔާ ޖަމާކުރެވުނެވެ.

މިނިސްޓްރީ އޮފް ފޮރިން އެފެއާޒްއިން ބައެއް މީޑިއާތަކަށް މައުލޫމާތު ދެއްވި ގޮތުގައި މި ފައިސާ ވަނީ އަންގާރަ ދުވަހު މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) މެދުވެރިކޮށް ޔޫ.އެން.އާރް.ޑަބްލިއު.އޭގެ ބޭންކް އެކައުންޓަށް ޖަމާކޮށްފައެވެ.

ޖޫން 12 ވަނަ ދުވަހު ޓެލެތޯން ފައްޓަވައިދެއްވަމުން ރައީސް މުޢިއްޒު ވަނީ ފަލަސްޠީނުގެ ރައްޔިތުންނަށް އެހީތެރިވުމުގައި ދިވެހި ރައްޔިތުން "އިންތިހާއަށް ދަރުމަވެރިވުމަށް" ގޮވާލައްވާފައެވެ. ރައީސް ވިދާޅުވީ ފަލަސްޠީނުގެ މައްސަލަ މިހާރު ވަނީ މިހާތަނަށް ނުދެކޭފަދަ ނުރައްކާތެރި ހިސާބަކަށް ގޮސްފައި ކަމަށާއި، މި ނާޒުކު ޙާލަތާ ދޭތެރޭ އެއްވެސް މީހަކު ލޯމަރައިގެން ތިބެގެން ނުވާނެ ކަމަށެވެ.

ރައީސް މުޢިއްޒު ވިދާޅުވީ ފަލަސްޠީނުގެ މައްސަލައަކީ ދެ ޤައުމެއްގެ ދެމެދުގައި އޮތް މައްސަލައެއް ނޫން ކަމަށާއި، "މުސްލިމަކަށް ވުމުގެ މާނައަކީ އެއް މުސްލިމަކަށް ދިމާވާ ދަތިކަމެއް މުޅި އުންމަތުން ޙިއްސާކުރުން" ކަމަށެވެ.

ރައީސް މުޢިއްޒު އަދި އަނބިކަނބަލުން ސަޖިދާ މުޙައްމަދު އަކީ ޓެލެތޯނުގައި އެންމެ ފުރަތަމަ ހަދިޔާކުރެއްވި ދެ ފަރާތެވެ.

ސަރުކާރުގެ އެކި މިނިސްޓްރީތަކުގެ އިތުރުން ދައުލަތުގެ އަދި އަމިއްލަ މުއައްސަސާތަކާއި، ކުންފުނިތަކާއި އަމިއްލަ ފަރުދުންވެސް ވަނީ ޓެލެތޯނުގައި ހިތްވަރުލާ ހަދިޔާކޮށްފައެވެ.

އެންމެ ބޮޑު އެއް ހަދިޔާއެއް ދެއްވީ މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް) އިންނެވެ. އެ މުއައްސަސާއިން ވަނީ 2.1 މިލިއަން ރުފިޔާއަށް ވުރެ ގިނަ އަދަދެއް ހަދިޔާކޮށްފައެވެ.

ޓެލެތޯނުގެ ތެރޭގައި، މިނިސްޓަރ އޮފް ފޮރިން އެފެއާޒް މޫސާ ޒަމީރު ވަނީ އިޒްރޭލުގެ ނުރައްކާތެރި ޙަމަލާތަކަށް ރިޢާޔަތްކޮށް ފަލަސްޠީނަށް ދޭ އެހީ 10 ގުނައަށް އިތުރުކުރާނެ ކަމަށް އިޢުލާނުކުރައްވާފައެވެ.

އޭނާ ވިދާޅުވީ ރާއްޖެއިން ކޮންމެ އަހަރަކު ފަލަސްޠީނަށް 5،000 އެމެރިކާ ޑޮލަރު ހަދިޔާކުރަމުން އައި ނަމަވެސް، މިހާރު އެ އަދަދު 50،000 އެމެރިކާ ޑޮލަރަށް އިތުރުކުރާނެ ކަމަށެވެ.

އިޒްރޭލުން މިހާރު ޣައްޒާގައި ހިންގަމުންދާ ހަނގުރާމަ ފެށުނީ މިދިޔަ އަހަރުގެ އޮކްޓޯބަރު 7 ވަނަ ދުވަހުއެވެ. މި ހަނގުރާމައިގައި މިހާތަނަށް 40،000 އަށްވުރެ ގިނަ ފަލަސްޠީނުން ޝަހީދުވެފައިވާއިރު، އޭގެ ތެރޭގައި ގިނަ އަދަދެއްގެ އަންހެނުންނާއި ކުޑަކުދިން ހިމެނެއެވެ.

މީގެ އިތުރުން، ޣައްޒާގެ ގިނަ ސަރަޙައްދުތަކެއް ވަނީ ވީރާނާވެފައެވެ. އަދި ގިނަ އަދަދެއްގެ ރައްޔިތުން ވަނީ ނިކަމެތި ޙާލުގައި ޖެހި، ކާބޯތަކެތީގެ ދަތިކަން ކުރިމަތިވެފައެވެ.