ނޫމަޑި މައްސަލައިގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ބައްދަލުކުރެއްވުމަށް ކުރީގެ ސީޕީ ހުސެއިން ވަހީދާއި އެއްކޮށް ވަޑައިނުގަންނަވާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
ސީޕީ ޝުޖާއު ފަރާތުން ފުލުހުން ނެރުނު ކުރު ބަޔާނެއްގައި ވިދާޅުވެފައިވަނީ އިއްޔެ ރޭ ކުރީގެ ކޮމިޝަނަރާ އޮފް ޕޮލިސް ހުސައިން ވަހީދު ދައްކަވާފައިވާ ވާހަކައެއްގައި ނޫމަޑި މައްސަލައިގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒާއި ބައްދަލުކުރެއްވުމަށް ދިޔަކަމަށް ވިދާޅުވެފައިވާ ވާހަކަތަކަކީ ހަގީގަތާއި ހިލާފު އަސާސެއް ނެތް ވާހަކައެއް ކަމަށެވެ. ނޫމަޑި މައްސަލައާ ގުޅޭގޮތުން މަޝްވަރާއެއް ކުރުމަށް ކުރީގެ ކޮމިޝަނާ އޮފް ޕޮލިސް ހުސެއިން ވަހީދާއެކު އެއްވެސް ފަރާތަކާއި އެއްވެސް ހައިސއްޔަތަކުން ބައްދަލުކޮށްފައި ނުވާނެ ވާހަކަ ކަށަވަރުކަމަށް ބަޔާނުގައި ވަނީ ބުނެފައެވެ.
ނޫމަޑިއަށް ގިނަ އަދަދެއްގެ ފައިސާ ސަރުކާރުން ދީފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި ހައުސިިން ޔުނިޓްތަކެއް އެޅުމަށް ނޫމަޑިއާ އެކު ހެދި އެއްބަސްވުން، ކުރީގެ ރައީސް އަބްދުﷲ ޔާމީންގެ ސަރުކާރުގައި ބާތިލް ކުރި މައްސަލައިގައި ބަދަލަށް 155 މިލިއަން ޑޮލަރު ހޯދަން ނޫމަޑިން އާބިޓްރޭޝަނަށް ހުށަހެޅުމުންނެވެ. އާބިޓްރޭޝަނުން ބޭރުގައި މަޝްވަރާކޮށް، ބަދަލުގެ ގޮތުގައި 55 މިލިއަން ޑޮލަރު ނޫމަޑި އަށް ދޭން ރައީސް ޞާލިހްގެ ސަރުކާރުން އެއްބަސްވެ އެ ފައިސާ ހަވާލުކޮށްފައިވެއެވެ.
މި މައްސަލައިގައި މިދިޔަ ސަރުކާރުގައި ރައީސް މުއިއްޒުގެ މައްޗަށް ދައުވާ ވެސް އުފުލިއެވެ. ރައީސްގެ މައްޗަށް ކުރި ދައުވާގައި ވަނީ ނޫމަޑިއާއެކު 2011 ގައި ދިވެހި ސަރުކާރުން ވެފައިވާ އެއްބަސްވުމާއި 2013 ގައި އެކުލަވާލި އެއްބަސްވުމުގެ މަސައްކަތް އެ ކުންފުނިން ލަސްތަކެއް ނުވެ ކުރަމުން ގެންދަނިކޮށް ނޫމަޑިއަށް ލަގްޒަރީ ވިލާ އެޅުމަށް ސަރުކާރުން ދޫކޮށްފައިވާ ޅ. ދިއްފުށިމާދޫ ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިނުވާ ކަމަށް ބުނެ ދޮގު ބަޔާނެއް ދީފައިވާ ކަމަށެވެ. ނަމަވެސް އެކަން ސާބިތުވެފައެއް ނުވެއެވެ.
ކޮމެންޓު ފޮނުވާ