14 ޤައުމަކުން ބައިވެރިވާ އެމްއެންޔޫގެ ތެވެލި ކޮންފަރެންސް މިއަދު ފަށައިފިއެވެ.
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ)އިން އަހަރަކު އެއް ފަހަރު ބާއްވަމުން އަންނަ "ތެވެލި" ކޮންފަރެންސް މިއަދު ހެނދުނު ފައްޓަވާދެއްވީ ރައީސުލްޖުމްހޫރިއްޔާ ޑރ، މުހައްމަދު މުއިއްޒުއެވެ.
މި ކޮންފަރެންސްގެ މި އަހަރުގެ ތީމަކީ " ބްރިޖިންގ ބައުންޑަރީސް އެކްސްޕްލޯރިންގ ސިނަރޖީސް އެކްރޮސް ރިސަރޗް ޑިސިޕްލިންސް" އެވެ.
އެމްއެންޔޫއިން މިއަހަރު ބާއްވާ މި ކޮންފަރެންސަކީ މިހާތަނަށް ބާއްވާ އެންމެ ކާމިޔާބު ކޮންފަރެންސްކަމުގައި ޔުނިވަރސިޓީންވަނީ ބުނެގައެވެ. އެގޮތުން މިއަހަރުގެ ކޮންފަރެންސްގައި ދުނިޔޭގެ 14 ޤައުމަކުން ބައިވެރިވާއިރު، 186 ކަރުދާސް ހުށައަޅާފައިވާ ކަމަށްވެސް ޔުނިވަރސިޓީން ބުނެފައި ވެއެވެ.
މި ކޮންފަރެންސްގައި ރާއްޖެއިން ބޭރުން ބައިވެރިވަނީ، ބަންގުލަދޭޝްއާއި މިސްރާއި އިންޑިޔާއާއި އިނޑޮނީޝިއާއާއި ޖަޕާނާއި ކެންޔާއާއި ލީބިއާއާއި މެލޭޝިއާއާއި ނިއުޒިލެންޑާއި ނައިޖީރިއާއާއި ޕާކިސްތާނާއި ކޮރެއާއި ސްރީލަންކާއި ޔޫކޭގެ އިތުރުން ޗައިނާއިންނެވެ.
ކުރީ އަހަރު ތަކެކޭ ވެސް އެއްފަދައިން މިއަހަރުވެސް "ތެވެލި ކޮންފަރެންސްގައި ހުށަހަޅާ ޕޭޕަރު ތަކުގެ ތެރެއިން "އައުޓް ސްޓޭންޑިންގ ޕޭޕަރ އޮފް ދަ ކޮންފަރެންސް" އާއި "އަރލީ ކެރިއަރ ރިސަރޗަރ" ޕޭޕަރު ހޮވާނެ ކަމަށް އެމްއެންޔޫއިން ބުނެއެވެ.
މި ކޮންފެރެންސްގައި އެކި ދާއިރާތަކުގެ ދިރާސާކުރުމުގެ ތަފާތު އެކި އުސޫލުތަކާއި ހަމަތަކާއި ގުޅޭގޮތުން މަޝްވަރާކޮށް، ތަފާތު ދާއިރާތަކުގައި ކުރެވިފައިވާ ދިރާސާތަކާއި ގުޅޭ ހުށައެޅުންތަށް ފެނިގެންދާނެއެވެ.
މި ކޮންފަރެންސްގެ ކީނޯޓް ސްޕީކާސް އިން ގެ ގޮތުގައި ބައިވެރިވެ ވަޑައިގަންނަވަނީ ޔުނިވާސިޓީ އޮފް ވޮޝިންޓަންގެ އޯޝަންއޯގްރާފަރ، ޑރ. ލުކް ރެއިންވައިލް، މޯލްޑިވިސް ކްލައިމެޓް އޮބްޒަރވަޓޮރީ (އެމްސީއޯއެޗް)ގެ އެންވާރޮމެންޓަލް ސައިންޓިސްޓް، ޑރ. ކްރިޝްނަކާންތް ބުދަވަންތް، ބްރިމިންގްހަމް ސިޓީ ޔުނިވާސިޓީގެ ޕްރޮފެސަރ، ޚަވާރް ހަމީދް، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ސީނިއަރ ކޮންސަލްޓެންޓް ސަބްސްޕެޝަލިސްޓް، ޑރ. އައިޝަތް އެލީނާގެ އިތުރުން ކިޔޯޓޯ ޔުނިވާސިޓީގެ ޕްރޮފެސަރ، ހިރޮއާކީ އޮގާޓާއެވެ.
އެކި ދާއިރާތަކުގެ ފުންނާބުއުސް ބޭފުޅުން ބައިވެރިވެލައްވާ މި ކޮންފެރެންސްގައި ކަނޑާއި ކަނޑުގެ ދިރުންތަކާއި ގުޅޭގޮތުން ކުރެވިފައިވާ ދިރާސާތަކާއި، ތިމާވެއްޓާއި މޫސުމަށް އަންނަ ބަދަލުތަކާއި، ޑިޖިޓަލް ވަސީލަތްތަށް ބޭނުންކޮއްގެން ތަޢުލީމު ފޯރުކޮއްދިނުމާއި ގުޅޭ ދިރާސާއާއި، ހިތުގެ ބަލިތަކާއި އެފަދަ ބަލިތަކަށް ހުރި ފަރުވާއާއި ގުޅުން ހުރި ދިރާސާގެ އިތުރުން އިންޕޮމޭޝަން ޓެކްލޮޖީ (އައިޓީ) ދާއިރާއާއި ގުޅުން ހުރި ދިރާސާތަށް ހިއްސާ ކުރާނެއެވެ.
"ތެވެލި ކޮންފެރެންސް" ގެ މައިގަނޑު މަޤްސަދަކީ ދުނިޔޭގެ އެކި ކަންކޮޅުތަކުގައި ތިއްބެވި ތަޖުރިބާކާރު ބޭފުޅުންނާއި ތަޢުލީމީ ބޭފުންގެ އެއްބާރުލުމާއެކު ދަރިވަރުން އެކި ދާއިރާތަކަށް އަހުލުވެރިކުރުވައި މަޢުލުމާތު މުއްސަނދިކުރުމެވެ.
