ގައުމަށް ފައިދާހުރި ކަންކަމުގައި ކުރެވޭ ދިރާސާތަކަށް ބޭނުންވާ އެހީތެރިކަން ސަރުކާރުން ފޯރުކޮށްދޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނި މިހެން ވިދާޅުވީ މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) އިން އިންތިޒާމް ކޮށްގެން ބާއްވާ "ތެވެލި" ކޮންފަރެންސްގެ 7 ވަނަ ބައްދަލުވުން ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.
މި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅިވީ، ދިރާސާތަކުގެ މައްޗަށް ބިނާކޮށް މަސައްކަތްތައް ރޭވިއްޖެނަމަ، ރާއްޖެ އިޤްތިޞާދީގޮތުން ފުދުންތެރި ޤައުމަކަށް ހެދުމަށް ކުރެވޭ މަސައްކަތްތަކަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ.
ރާއްޖޭގެ އިޤްތިޞާދު ފުޅާކުރުމަށް ކުރިމަގަށް ގިނަ މުހިންމު ކަންތައްތަކެއް ސަރުކާރުން ވަނީ ރާވާފައި. ދަނޑުވެރިކަން، މަސްވެރިކަމުގެ ސިނާޢަތް، ތިމާވެށީގެ އިޖާދުތައް، އާއްމު ސިއްޙަތާ ގުޅޭ ކަންކަން، ފަތުވެރިކަން ފަދަ ދާއިރާތަކުން ގިނަ އިންވެސްޓްމަންޓްތަކެއް އަންނާނެ. މިކަމަށް ދިރާސާ ބޭނުންވޭ. ދިރާސާތަކަށް ބޭނުންވާ އެހީތެރިކަންވެސް ދޭން ސަރުކާރުން ނިންމާފައިވަނީ، މިފަދަ މުހިންމު ކަންކަން ހާސިލްކުރުމަށް.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.
ރައީސް ވިދާޅުވީ ދިރާސާއަކީ ހަމައެކަނި ތަޢުލީމީ އަދި ސިޔާސީ ބޭނުމަށް ކުރާ ކަމެއް ނޫން ކަމަށާއި، އެއީ ޤައުމަށް ފައިދާހުރި ސިނާޢަތްތައް ކުރިއަރުވައި، ފުދުންތެރި މުޖުތަމަޢެއް ބިނާކުރުމަށް ކުރެވޭ އެންމެ މުހިންމު މަސައްކަތް ކަމަށެވެ. ރާއްޖެފަދަ ކުޑަ ޤައުމަކަށް ގިނަ ގޮންޖެހުންތަކެއް ހުރިކަމަށް ފާހަގަކުރައްވައި، ތިމާވެށި، އާންމު ޞިއްޙަތު އަދި ޒަމާނީ ޓެކްނޮލޮޖީގެ ދާއިރާތަކުގައި ގިނަ ހިރާސްތަކެއް ހުރިކަމަށް ވިދާޅުވިއެވެ.
ރާއްޖޭގެ އިޤްތިޞާދީ ޙާލަތު ރަނގަޅުކުރުމަށް ދިރާސާތަކުގެ މުހިންމުކަން ފާހަގަކުރައްވައި، ރައީސް ވަނީ ދިރާސާތަކަށް ޚާއްސަ ގްރާންޓެއް ދެއްވުމަށް ނިންމަވާފައެވެ. އަދި ދަނޑުވެރިކަން، މަސްވެރިކަން، ތިމާވެށި، އާންމު ޞިއްޙަތު އަދި ފަތުރުވެރިކަމުގެ ދާއިރާތަކުން ގިނަ އިންވެސްޓްމަންޓްތަކެއް އަންނާނެ ކަމަށް ވިދާޅުވިއެވެ.
ސަރުކާރާއި އަމިއްލަ ސެކްޓަރ އަދި ތަޢުލީމީ މަރުކަޒުތައް ގުޅިގެން މަސައްކަތްކޮށްފިނަމަ، މުޖުތަމަޢުގެ ބޮޑެތި މައްސަލަތަކަށް ޙައްލު ހޯދޭނެ ކަމަށާއި، ރާއްޖެއަކީ ކުރިމަގުގައި ނޮލެޖް ހަބަކަށް ހެދިދާނެ ކަމަށް ރައީސް ވިދާޅުވިއެވެ. ސަރަޙައްދީ އަދި ބައިނަލްއަޤްވާމީ ފެންވަރުގައި ފާހަގަކުރެވޭ ދިރާސާތަކެއް ރާއްޖޭގައި ކުރެވިދާނެ ކަމަށް ވިދާޅުވެ، ދިވެހި އަދި ބޭރުގެ ދިރާސާވެރިންނަށް އެކަމަށް ގޮވާލެއްވިއެވެ. އަދި ދިރާސާތައް ކުރިއެރުވުމުގައި ދިވެހިރާއްޖޭގެ ޤައުމީ ޔުނިވަރސިޓީ އާއި އެހެނިހެން ތަޢުލީމީ މަރުކަޒުތަކުން ކުރާ މަސައްކަތްތައްވެސް ރައީސް ފާހަގަކުރެއްވިއެވެ.
އެކި ދާއިރާތަކުގެ ފުންނާބުއުސް ބޭފުޅުން ބައިވެރިވެލައްވާ މި ކޮންފެރެންސްގައި ކަނޑާއި ކަނޑުގެ ދިރުންތަކާއި ގުޅޭގޮތުން ކުރެވިފައިވާ ދިރާސާތަކާއި، ތިމާވެއްޓާއި މޫސުމަށް އަންނަ ބަދަލުތަކާއި، ޑިޖިޓަލް ވަސީލަތްތަށް ބޭނުންކޮއްގެން ތަޢުލީމު ފޯރުކޮއްދިނުމާއި ގުޅޭ ދިރާސާއާއި، ހިތުގެ ބަލިތަކާއި އެފަދަ ބަލިތަކަށް ހުރި ފަރުވާއާއި ގުޅުން ހުރި ދިރާސާގެ އިތުރުން އިންޕޮމޭޝަން ޓެކްލޮޖީ (އައިޓީ) ދާއިރާއާއި ގުޅުން ހުރި ދިރާސާތަށް ހިއްސާ ކުރާނެއެވެ.
"ތެވެލި ކޮންފެރެންސް" ގެ މައިގަނޑު މަޤްސަދަކީ ދުނިޔޭގެ އެކި ކަންކޮޅުތަކުގައި ތިއްބެވި ތަޖުރިބާކާރު ބޭފުޅުންނާއި ތަޢުލީމީ ބޭފުންގެ އެއްބާރުލުމާއެކު ދަރިވަރުން އެކި ދާއިރާތަކަށް އަހުލުވެރިކުރުވައި މަޢުލުމާތު މުއްސަނދިކުރުމެވެ. ދުނިޔޭގެ 14 ޤައުމަކުން ކޮންފަރެންސްގައި ބައިވެރިވާއިރު، 186 ކަރުދާސް ހުށައަޅާފައިވާ ކަމަށެވެ.
މި ކޮންފަރެންސްގައި ރާއްޖެއިން ބޭރުން ބައިވެރިވަނީ، ބަންގުލަދޭޝްއާއި މިސްރާއި އިންޑިޔާއާއި އިނޑޮނީޝިއާއާއި ޖަޕާނާއި ކެންޔާއާއި ލީބިއާއާއި މެލޭޝިއާއާއި ނިއުޒިލެންޑާއި ނައިޖީރިއާއާއި ޕާކިސްތާނާއި ކޮރެއާއި ސްރީލަންކާއި ޔޫކޭގެ އިތުރުން ޗައިނާއިންނެވެ. މި ކޮންފަރެންސްގެ މި އަހަރުގެ ތީމަކީ " ބްރިޖިންގ ބައުންޑަރީސް އެކްސްޕްލޯރިންގ ސިނަރޖީސް އެކްރޮސް ރިސަރޗް ޑިސިޕްލިންސް"އެވެ. އެވެ.
