އިސްރާއީލު ޕާސްޕޯޓް މަނާކުރާއިރަށް މުޅި ޔޫރަޕް އުތުރި އަރާނެ، އެހިސާބުން ރާއްޖޭގެ އިގްތިސާދު ފުނޑުފުނޑު ވާނެ ރައްޔިތުންގެ މަޖިލިހުގެ ވެލިދު ދާއިރާގެ އެމްޑީއޭގެ މެމްބަރު މުހައްމަދު އައްބާސް މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންޝުއަރެންސް ބިލުގެ ބަހުސް ތެރޭގައި އިސްރާއީލު ޕާސްޕޯޓް މަނާކުރުމުގެ މައްސަލަ އަލުން މަޖިލީހުގެ ތަޅުމަށް ވަނީ އައިސްފައެވެ. މި މައްސަލައާ ގުޅިގެން މަޖިލީހުގެ މެންބަރުން ތަފާތު ޚިޔާލުތައް ފާޅުކޮށްފައިވެއެވެ.

ވެލިދޫ ދާއިރާގެ އެމްޑީއޭގެ މެންބަރު މުޙައްމަދު އައްބާސް ވިދާޅުވެފައިވަނީ އިސްރާއީލު ޕާސްޕޯޓް މަނާކުރުމަކީ ރާއްޖޭގެ އިޤްތިޞާދަށް ނޭދެވޭ އަސަރުކުރާނެ ކަމެއް ކަމަށެވެ. އޭނާ ވިދާޅުވީ މިއީ ކުރީގެ ސަރުކާރުން ރާއްޖޭގެ ފަތުރުވެރިކަން ފުނޑާލުމަށް ރާވާފައިވާ ކަމެއް ކަމަށެވެ. އައްބާސް އިތުރަށް ވިދާޅުވީ މިފަދަ ފިޔަވަޅެއް އެޅިއްޖެނަމަ މުޅި ޔޫރަޕް ކެކިއަރައިގަނެ، ރާއްޖޭގެ އިޤްތިޞާދަށް ބޮޑު ގެއްލުމެއް ލިބިދާނެ ކަމަށެވެ.

އިސްރާއީލް ޕާސްޕޯޓޭ ކިޔައިގެން މިތާ މި ވާހަކަދައްކަވަނީ ކީއްވެގެންތޯ؟ އަސްލު އެ ބޭފުޅުން ބޭނުމެއް ނުވޭ އިސްރާއީލު ޕާސްޕޯޓު މަނާކުރާކަށް. އެމީހުން ބޭނުންވަނީ ދިވެހިރާއްޖޭގެ ޓޫރިޒަމް ބޮއިކޮޓްކުރަން. އެމީހުންނަށް އެބަ އެނގޭ އިސްރާއީލުގައި އުޅެނީ ހުސްއެކަނި ޔަހޫދީން ނޫންކަން، މުސްލިމުންވެސް އެބައުޅޭކަން. ޔޫރަޕުގެ ކޮންމެ ތަނެއްގައި ޔަހޫދީން އެބަތިބިކަން. މުޅި ޔޫރަޕް އުތުރި އަރާނެކަން އިސްރާއީލު ޕާސްޕޯޓް މަނާކުރާއިރަށް. އެހިސާބުން ރާއްޖޭގެ އިގތިސާދު ފުނޑުފުނޑުކޮށްލެވޭނެ ކަން އެބަ އެނގޭ.

އައްބާސް ވިދާޅުވިއެވެ.

އެހެންނަމަވެސް، ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް ވަނީ އިސްރާއީލު ޕާސްޕޯޓް މަނާކުރުމަށް ހުށަހެޅި ބިލުގެ މަސައްކަތް ލަސްވަމުންދާ ކަމަށް ފާހަގަކުރައްވާފައެވެ. އޭނާ ވިދާޅުވީ މި ބިލު މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީގައި ދެ މަސް ވަންދެން އެޖެންޑާ ނުކޮށް އޮތް ކަމަށެވެ.

މި ބިލުގެ މަޤްޞަދަކީ އިސްރާއީލުން ފަލަސްތީނުގެ މައްޗަށް ހިންގާ އަނިޔާވެރި ޢަމަލުތަކާ ދެކޮޅަށް ރާއްޖެއިން އަޅާ ފިޔަވަޅެއްގެ ގޮތުން އިސްރާއީލު ޕާސްޕޯޓް ގެންގުޅޭ ފަރާތްތަކަށް ރާއްޖެ އެތެރެވުން މަނާކުރުމެވެ.

މި މައްސަލައިގައި މެންބަރުން ތަފާތު ޚިޔާލުތައް ފާޅުކުރަމުންދާއިރު، މައްސަލައިގެ މުހިންމުކަމާއި އޭގެ ސަބަބުން ރާއްޖޭގެ އިޤްތިޞާދަށް ކޮށްފާނެ އަސަރާ މެދު ކަންބޮޑުވުން ފާޅުކުރެވެމުންދެއެވެ. އެހެންނަމަވެސް އިސްރާއީލުގެ ޕާސްޕޯޓު މަނާކުރުމަށް މަޖިލިހަށް ހުށަހެޅި ބިލް 241 ކޮމިޓީގައި ޕާކްވެފައި އޮންނަތާ މިހާރުވަނީ 60 ދުވަސް ފާއިތުވެގެން ގޮސްފައެވެ.