ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު މާލޭ ސިޓީ ކައުންސިލަށް ވަޑައިގެން، މާލެ ސަރަހައްދުގައި ދޫކުރާ ފްލެޓުތަކުގެ ލިސްޓު އިވެލުއޭޓް ކުރުމުގައި ކައުންސިލްގެ ދައުރު އޮންނާނެކަން ކަމުގެ ޔަގީންކަން އެކައުންސިލަށް ދެއްވައިވިއެވެ.
މި ބައްދަލުވުމުގައި މާލޭގެ މޭޔަރު އާދަމް އާޒިމް ފާހަގަކުރެއްވި ގޮތުގައި، ފްލެޓާއި ގޯތީގެ މައްސަލަތަކުގައި ގިނަ ރައްޔިތުން ކައުންސިލަށް މުރާޖަޢާކުރާ ކަމަށާއި، މައްސަލައެއް ނެތް ފަރާތްތަކަށް ވީހާވެސް އަވަހަށް ފްލެޓު ހަވާލުކޮށްދިނުމަށް އެދިވަޑައިގަތެވެ.
ރައީސް މުއިއްޒު ވިދާޅުވީ، މާލޭ ސިޓީގެ މައްސަލަތައް ހައްލުކުރުމުގައި ރައްޔިތުން އިންތިޚާބުކޮށްފައިވާ ކައުންސިލްގެ ދައުރު މުހިންމު ކަމަށެވެ. "ގެދޮރުވެރިޔާ" ސްކީމުގެ ދަށުން ކުރީގެ ސަރުކާރުން ދޫކުރި ފްލެޓު ލިސްޓު އިވެލުއޭޓްކުރުމުގައި ކައުންސިލްގެ ބައިވެރިވުން އޮންނާނެކަމަށް ވިދާޅުވެ، އެކަން ކުރިއަށް ގެންދާނީ ކޮމިޓީއެއް އެކުލަވާލައިގެން ކަމަށް އިރުޝާދު ދެއްވާފައިވާކަން ފާހަގަކުރެއްވިއެވެ.
ގެދޮރުގެ މައްސަލައަކީ އެންމެ ބޮޑު މައްސަލަ ކަމަށް ފާހަގަކުރައްވައި، މާލެ ސަރަހައްދުގެ އެކި ހިސާބުތަކުގައި ފްލެޓު އެޅުމާއި ގޯތި ދޫކުރުމުގެ ގިނަ މަޝްރޫޢުތަކެއް ކުރިއަށް ގެންދާނެކަން ރައީސް އިއުލާނުކުރެއްވިއެވެ. "ގެދޮރުވެރިޔާ" ސްކީމްގެ 32 ޓަވަރުގެ ތެރެއިން ފުރަތަމަ 6 ޓަވަރުގެ މަސައްކަތް އަންނަ އޮކްޓޯބަރު މަހަށް ނިމޭނެކަމަށްވެސް ވިދާޅުވިއެވެ.
ނިމިދިޔަ ސަރުކާރުގެ ބޯހިޔާވަހިކަމުގެ ސްކީމުގެ ދަށުން ދޫކުރި ފްލެޓުތަކާ ގުޅިގެން އާންމުންގެ ކަންބޮޑުވުންތަކެއް އުފެދުމާ ގުޅިގެން، އެ މައްސަލަ އޭސީސީން ބަލައި، ތަޙުޤީޤުކުރިއެވެ. އޭސީސީގެ ހޯދުންތަކުން ދައްކާގޮތުގައި، އޭރު ދޫކުރި 4000 ފްލެޓުގެ ތެރެއިން 60 ޕަސެންޓަކީ ޝަރުތު ހަމަނުވާ ފަރާތްތަކަށް ދޫކޮށްފައިވާ ފްލެޓުތަކެކެވެ. މިހާރު ކުރިއަށްދަނީ އެ ފްލެޓުތައް އަލުން ހަވާލުކުރުމުގެ މަސައްކަތެވެ.
ކޮމެންޓު ފޮނުވާ