އައްޑޫގެ ހަންކެޑެ ބްރިޖު ރަސްމީކޮށް ހުޅުވުމަށް ނިންމައިފިއެވެ. މި ރަސްމިއްޔާތު އޮންނާނީ މާދަމާއެވެ. ބްރިޖު ހުޅުވައިދެއްވާނީ މިހާރު ރާއްޖެއަށް ޒިޔާރަތްކުރައްވާފައިވާ އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރެވެ.
ނަމަވެސް، ބްރިޖު އާންމު ރައްޔިތުންނަށް ބޭނުންކުރެވޭނީ އަންނަ މަހުގެ ތެރޭގައެވެ. ޖައިޝަންކަރުގެ އައްޑޫ ދަތުރުފުޅުގައި ބްރިޖު ހުޅުވުމުގެ އިތުރުން، އައްޑޫގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ ނިންމުން ވެސް ފާހަގަކުރެއްވުމަށް ވަނީ ހަމަޖެހިފައެވެ.
މި އައު ބްރިޖަކީ ކުރިން ހަންކެޑެއާއި ގައުކެނޑި ގުޅުވާފައި އޮތް ބްރިޖުގެ ބަދަލުގައި ބޭނުންކުރާނެ ބްރިޖެކެވެ. މި ބްރިޖު ގުޅުވާލަނީ މަރަދޫ އަވަށުގެ ބޮޑުގެ މަގާއި ގައުކެނޑިއެވެ. އެފްކޮންސްއިން މި ބްރިޖު އެޅުމުގެ މަސައްކަތް ފެށީ 2021 ވަނަ އަހަރުއެވެ.
ހަންކެޑެ-ގައުކެނޑި ބްރިޖު ބަދަލުކުރަން ނިންމީ ހަންކެޑޭގައި އެއްކޮށްލެވިފައިވާ ފަތުރުވެރިކަން (އިންޓަގްރޭޓެޑް ޓޫރިޒަމް) ތަރައްޤީކުރުމަށް ރޭވިފައިވާތީއެވެ. މި ތަރައްޤީގެ މަސައްކަތް ހަވާލުކޮށްފައިވަނީ ޗައިނާގެ ކުންފުންޏެއް ކަމަށްވާ ޗައިނާ ނޭޝަނަލް އިލެކްޓްރިކަލް އިންޖިނިއަރިންގ (ސީއެންއީސީސީ) އާއެވެ. މި މަސައްކަތް ހަވާލުކުރީ މޯލްޑިވްސް ފަންޑު މެނޭޖްމަންޓު ކޯޕަރޭޝަން (އެމްއެފްއެމްސީ) އިންނެވެ.
