ރާއްޖޭގެ ރައީސް ޑރ. މުޙައްމަދު މުޢިއްޒުގެ "ހަރުދަނާ ޚާރިޖީ ސިޔާސަތަށް" ރައްޔިތުންގެ މަޖިލިހުގެ ރައީސް އަބްދުއްރަހީމް ތައުރީފް ކުރައްވައިފިއެވެ.
އަބްދުއްރަހީމް ކުރެއްވި އެކްސް ޕޯސްޓެއްގައި ވިދާޅުވީ، "ރައީސް ޑރ. މުޢިއްޒު ގެންގުޅުއްވާ ހަރުދަނާ ޚާރިޖީ ސިޔާސަތުގެ ސަބަބުން ދިވެހިރާއްޖޭގެ ކުރިމަގު ފެންނަނީ ނިކަން އުޖާލާކޮށް." ކަމުގައެވެ. އަދި ގައުމާ ރައްޔިތުންގެ ޙައްގުގައި ރައީސް މުއިއްޒު ކުރައްވާ މަސައްކަތްޕުޅަށާ ދައްކަވާ ސާބިތުކަމަށް އައްސަރިބަހާ ސާބަސް ދަންނަވާ ކަމުގައިވެސް އަބުދުއްރަހީމް ވިދާޅުވެފައި ވެއެވެ.
ޝުކުރިއްޔާ ރައީސް ޑރ.މުޢިއްޒު.މަނިކުފާނު ތިޔަ ގެންގުޅުއްވާ ހަރުދަނާ ޚާރިޖީ ސިޔާސަތުގެ ސަބަބުން ދިވެހީންގެ ރާއްޖޭގެ ކުރިމަގު ފެންނަނީ ނިކަން އުޖާލާކޮށް.ގައުމާ ރައްޔިތުންގެ ޙައްގުގައި ތިޔަކުރައްވާ މަސައްކަތްޕުޅަށާ ތިޔަ ދައްކަވާ ސާބިތުކަމަށް އައްސަރިބަހާ ސާބަސް ދަންނަވަން… pic.twitter.com/mGt53hcxVx
— Abdul Raheem Abdulla (@Banafsaa) August 10, 2024
އަބުދުއްރަހީމް ރައީސް މުއިއްޒުގެ ޚާރިޖީ ސިޔާސަތަށް ތައުރީފް ކުރައްވާފައިވާއިރު، ރައީސް މުއިއްޒުވަނީ މިއަދު އިންޑިއާގެ ޚަރިޖީ ވަޒީރު ޑރ. ޖައިޝަންކަރުއާއި ބައްދަލު ކުރައްވާ، އިންޑިއާ ރާއްޖޭގެ ގުޅުން އިތުރަށް ބަދަހި ކުރައްވާނެ ކަމަށް ވިދާޅުވެފައެވެ. އަދި އިންޑިއާއަކީ އަގު ނުކުރެވޭނެ ވަރުގައި ގާތް އަވައްޓެރި ގައުމެއްކަމަށްވެސް ރައީސް މުއިއްޒު ވިދާޅުވެފައި ވެއެވެ.
ރައީސް މުއިއްޒު މިއަދު ޑރ. ޖައިޝަންކަރުއާ ބައްދަލު ކުރައްވާފައިވާއިރު، މިވެރިކަން ފެށުމާއެކު އިންޑިއާ ރާއްޖޭގެ ގުޅުން ވަރަށްބޮޑަށް ގޯސްވެގެން ގޮސްފައި ވެއެވެ. އެހެންނަމަވެސް މިސަރުކާރުގެ ޚާރިޖީ ވަޒީރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅަށްފަހު ގުޅުންވަނީ ރަގަޅުވާން ފަށާފައެވެ.
