އިންޑިއާއަކީ ދިވެހިރާއްޖެއަށް އަގުނުކުރެވޭފަދަ އެކުވެރިއެއްކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އިންޑީއާއަކީ ރާއްޖޭއގެ އެންމެ ބޮޑު އެކުވެރިޔާގެ ގޮތުގައި ސިފަކުރައްވާ ރައީސް މުއިއްޒު ވިދާޅުވީ ރާއްޖެއަށް އެހީތެރިކަން ބޭނުންވާ ކޮންމެ ހިނދެއްގައި އިންޑިއާގެ އެހީތެރިކަން ލިބެމުންދާކަމުގައެވެ.
މި ވާހަކަފުޅުތައް ރައީސް ދެއްކެވީ، އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ޤާއިމްކޮށްފައިވާ ފެނާއި ނަރުދަމާ ނިޒާމުގެ މަޝްރޫޢުތައް ނިންމައި، އިންޑިއާ ސަރުކާރުން ހަވާލުކުރުމަށް ބޭއްވި ރަސްމިއްޔާތުގައެވެ.
މި މުހިންމު ރަސްމިއްޔާތުގައި އިންޑިއާ ސަރުކާރުގެ ފަރާތުން މަޝްރޫޢުތައް ރަސްމީކޮށް ހަވާލުކޮށްދެއްވީ އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރެވެ. ރައީސް މުޢިއްޒު ވިދާޅުވި ގޮތުގައި، ވަޒީރު ޖައިޝަންކަރުގެ މި ދަތުރުފުޅާ ގުޅިގެން އިންޑިއާއާއެކު އޮތް އެކުވެރި ރަޙްމަތްތެރިކަމުގެ ގުޅުން އިތުރަށް ހަރުދަނާވެ، ދެ ޤައުމުގެ ގުޅުން އާ ހަރުފަތަކަށް އުފުލިގެން ދާނެއެވެ. އަދި ކުރިމަގުގައިވެސް މި ގުޅުން އިތުރަށް ވަރުގަދަކުރުމަށް މި ސަރުކާރުން މަސައްކަތްކުރާނެކަމުގެ ޔަޤީންކަން ރައީސް ވަނީ ދެއްވާފައެވެ.
އިންޑިއާއަކީ ބޭނުންޖެހޭ ކޮންމެ ވަގުތެއްގައި ރާއްޖެއަށް އެހީތެރިވާން އޮންނަ ގައުމެއް. އަދި އެކި ދާއިރާތަކުން ރާއްޖެއަށް އެހީތެރިވުމުގައި އަގުނުކުރެވޭ އަވައްޓެރިއެއް.
ރައީސް މުޢިއްޒު ވިދާޅުވިއެވެ.
ރައީސް އިތުރަށް ފާހަގަކުރެއްވި ގޮތުގައި، އިންޑިއާގެ އެހީގައި ކުރިއަށް ގެންދެވުނު މި މަޝްރޫޢުތަކަކީ ރާއްޖޭގެ ތަރައްޤީއާއި ކުރިއެރުމަށް ވަރަށް މުހިންމު ހިއްސާއެކެވެ. މި މަޝްރޫޢުތަކުގެ ސަބަބުން ރައްޔިތުންގެ ދިރިއުޅުމުގެ ފެންވަރު މަތިވެ، ދިރިއުޅުމުގެ ޙާލަތު ރަނގަޅުވާނެކަން އެމަނިކުފާނު ފާހަގަކުރެއްވިއެވެ.
މި މުހިންމު ރަސްމިއްޔާތުގައި ރައީސް އޮފީހުގެ އިސްވެރިންނާއި، ވަޒީރުންގެ މަޖިލީހުގެ މެންބަރުންގެ އިތުރުން، އިންޑިއާގެ ސަފީރު މުނު މަހާވަރުވެސް ބައިވެރިވެވަޑައިގެންނެވިއެވެ. މި ރަސްމިއްޔާތަކީ ދެ ޤައުމުގެ ދެމެދުގައިވާ ގާތް ގުޅުމުގެ އިތުރު ހެއްކެއްގެ ގޮތުގައި ފާހަގަކުރެވެއެވެ.
