އިސްރާއީލުން ޢައްޒާއަށް ދިން އެންމެ ފަހުގެ ހަމަލާތަކުގައި ފަލަސްތީނުގެ 100 މީހުން ޝަހީދު ކޮށްލައިފިއެވެ.
ޣައްޒާ ސިޓީގެ ދަރަޖް ސަރަހައްދުގައި ހުރި އަލް-ތަބިން ސްކޫލަށް އިޒްރޭލުން ދިން މިސައިލް ހަމަލާއެއްގައި 100 އަށްވުރެ ގިނަ މީހުން މަރުވެ، އެތައް ބަޔަކު ޒަޚަމްވެފައިވާ ކަމަށް ވަނީ ރިޕޯޓުކުރެވިފައެވެ.
ފަލަސްތީނުގެ ރެފިއުޖީންނާ ބެހޭ އދ. ގެ އޭޖެންސީ (އަންރުވާ) އިން ބުނެފައިވާ ގޮތުގައި، އިޒްރޭލުގެ ސިފައިން ވަނީ ޚާން ޔޫނިސް ސަރަހައްދުން 60,000 އާއި 70,000 އާ ދެމެދުގެ އަދަދެއްގެ މީހުން، މީހުން ބައިބޯ އަލް-މަވާސީ ސަރަހައްދަށް ބަދަލުކުރުމަށް މަޖުބޫރުކޮށްފައެވެ. މި ކަމުގެ ސަބަބުން އެ ސަރަހައްދުގެ އިންސާނީ ހާލަތު އިތުރަށް ގޯސްވެދާނެ ކަމުގެ ބިރު ވަނީ ހީވެފައެވެ.
އަލް ޖަޒީރާގެ ނޫހުން ރިޕޯޓު ކޮށްފައިވާ ގޮތުގައި، އިޒްރޭލުން އެންމެ ފަހުން ދިން ހަމަލާތަކުގައި މަދުވެގެން 35 މީހުން ޝަހީދުވެފައި ވެއެވެ. މީގެ ތެރެއިން 19 މީހުން ޝަހީދުވެފައިވަނީ ޚާން ޔޫނިސްގައެވެ. މި ހަނގުރާމައިގެ ސަބަބުން މިހާތަނަށް މަދުވެގެން ފަލަސްތީނުގެ 39,699 މީހުން ޝަހީދުވެ، 91,722 މީހުން ޒަޚަމްވެފައިވާ ކަމަށް ވަނީ ރިޕޯޓުކުރެވިފައެވެ.
އިޒްރޭލާއި ހަމާސްގެ މެދުގައި ހިނގަމުންދާ މި ހަނގުރާމަ ފެށުނީ އޮކްޓޯބަރު 7 ގައި ހަމާސްގެ ޖަމާޢަތުން އިސްނަގައިގެން އިޒްރޭލަށް ދިން ކުއްލި ހަމަލާއާ ގުޅިގެންނެވެ. މި ހަމަލާގައި އިސްރާއީލުގެ 1,139 މީހުން މަރުވެ، 200 އަށްވުރެ ގިނަ މީހުން ރަހީނުކުރެވުނެވެ.
މި ދަނޑިވަޅުގައި، އެމެރިކާއިން ވަނީ އިޒްރޭލަށް 3.5 ބިލިއަން ޑޮލަރުގެ ހަތިޔާރާއި ސިފައިންގެ އާލާތްތައް ގަތުމަށް ދޭން ނިންމާފައެވެ. މި ނިންމުން އައިސްފައިވަނީ އިޒްރޭލުން ޓެހުރާނުގައި ހުރި ހަމާސްގެ ލީޑަރަކާއި ލުބުނާނުގެ ބައިރޫޓުގައި ހުރި ހިޒްބުﷲގެ ކޮމާންޑަރެއް އަވަހާރަކޮށްލުމާ ގުޅިގެން، ސަރަހައްދީ ހަނގުރާމައެއް ފެށުމުގެ ބިރުވެރިކަން އިތުރުވެފައިވާ ދަނޑިވަޅެއްގައެވެ.
