ސަރުކާރުގެ މައި ޕާޓީ ޕީއެންސީން މެންބަރުޝިޕް އިތުރުކުރުމަށް އައު މަސައްކަތެއް ފަށައިފިއެވެ. މި މަސައްކަތާއި ގުޅޭގޮތުން ބައެއް މީޑިއާތަކަށް މައުލޫމާތު ދެއްވަމުން ޕީއެންސީގެ ސެކްރެޓަރީ ޖެނެރަލް ޒީނާޒް އަދުނާން ވިދާޅުވީ މި ހަރަކާތް މި މަހު ތެރޭގައި ފެށި، މުޅި ރާއްޖެއަށް ފުޅާކުރެވިގެންދާނެ ކަމަށެވެ.
ޒީނާޒް އިތުރަށް ވިދާޅުވި ގޮތުގައި މި ހަރަކާތުގެ މަޤްޞަދަކީ ޕީއެންސީއަށް ވަންނަން ޝައުޤުވެރިވާ ފަރާތްތަކަށް އެ ފުރުޞަތު ފަހިކޮށްދިނުމާއި، ޕާޓީގެ މެންބަރުޝިޕް އިތުރުކުރުމެވެ. މި ގޮތުން ގޭގެއަށް ޒިޔާރަތްކޮށް، މެންބަރުކަމަށް އެދޭ ފޯމު ފުރުމުގައި އެހީތެރިވެދޭނެ ކަމަށް އޭނާ ހާމަކޮށްފައި ވެއެވެ.
ވަކި ޕާޓީއަކަށް އަމާޒުކޮށްގެން ނޫން ނަމަވެސް، މި ހަރަކާތުގެ ސަބަބުން ޕީއެންސީ ކޯލިޝަނުގައި ހިމެނޭ ޕީޕީއެމްގެ ގިނަ މެންބަރުން ޕީއެންސީއަށް ބަދަލުވަމުންދާ ކަމަށް ޒީނާޒް ފާހަގަކުރެއްވިއެވެ.
މިހާރު މި މަސައްކަތް 12 ދާއިރާއެއްގައި ކުރިއަށްދާ ކަމަށާއި، އޭގެ ތެރޭގައި މާލެ އާއި ވިލިނގިލި ހިމެނޭ ކަމަށް އޭނާ ވިދާޅުވެފައި ވެއެވެ. އަދި ކުރިއަށް އޮތް ދުވަސްތަކުގައި އިތުރު ދާއިރާތަކަށް މި މަސައްކަތް ފުޅާކުރެވިގެންދާނެ ކަމަށްވެސް އޭނާ ހާމަކުރެއްވިއެވެ.
އިލެކްޝަންސް ކޮމިޝަން (އީސީ)ގެ ތަފާސްހިސާބުތަކަށް ބަލާއިރު، މިވަގުތު ރަޖިސްޓަރީކޮށްފައިވާ 11 ސިޔާސީ ޕާޓީގެ ތެރެއިން އެންމެ ގިނަ މެންބަރުން ތިބި ޕާޓީއަކީ އިދިކޮޅު އެމްޑީޕީ އެވެ. އެމްޑީޕީގައި 50،980 މެންބަރުން ތިބިއިރު، ދެވަނައަށް އެންމެ ގިނަ މެންބަރުން ތިބި ޕީޕީއެމްގައި 34،827 މެންބަރުން ތިބެއެވެ. ތިންވަނައިގައިވާ ޕީއެންސީގައި 28،704 މެންބަރުން ރަޖިސްޓަރީވެފައިވެއެވެ.
