ސަރުކާރު ހިއްސާވާ ކުންފުނިތަކުން ގިނަ އަދަދެއްގެ މުވައްޒަފުން ވަކިކުރަމުންދާ މައްސަލަ ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އިން ހަރުކަށި އިބާރާތުން ކުށްވެރިކޮށްފައެވެ. އަދި މި ޢަމަލު ވަގުތުން ހުއްޓާލުމަށް ސަރުކާރަށް ގޮވާލާފައިވެއެވެ.
އެމްޑީޕީން ބުނެފައިވަނީ ރައީސް ޑރ. މުޙައްމަދު މުޢިއްޒުގެ ސަރުކާރުން މިފަދަ ފިޔަވަޅުތައް އަޅަމުންދަނީ ރިޔާސީ އިންތިޚާބުގެ ކެމްޕޭނުގައި ދެއްވާފައިވާ ވަޢުދުތަކާ ޚިލާފަށް ކަމަށެވެ. ކެމްޕޭނުގައި ރައީސް މުޢިއްޒު ވަނީ ސަރުކާރު ހިއްސާވާ ކުންފުނިތަކުގެ އެއްވެސް މުވައްޒަފަކު ވަޒީފާއިން ވަކިނުކުރާނެކަމުގެ ޔަޤީންކަން ރައްޔިތުންނަށް ދެއްވާފައެވެ.
އިޤްތިޞާދީ ގޮތުން ދަތި ދަނޑިވަޅެއްގައި ގިނަ އާއިލާތަކެއްގެ އާމްދަނީ މަގު ބަންދުކޮށް، އެ އާއިލާތައް ދަތި ހާލުގައި ޖެއްސުމަކީ ޤަބޫލުކުރެވޭނެ ކަމެއް ނޫން ކަމަށް އެމްޑީޕީން ބުނެފައިވެއެވެ. އަދި މުވައްޒަފުން ވަކިކުރަމުންދާއިރު، ސަރުކާރުގެ ކުންފުނިތަކުގައި ޑެޕިއުޓީ މެނޭޖިންގ ޑިރެކްޓަރުންނާއި އިސް ވެރިންގެ އަދަދު އިތުރުކޮށްފައިވާކަންވެސް އެމްޑީޕީން ފާހަގަކޮށްފައިވެއެވެ.
މީގެ އިތުރުން، ސަރުކާރުގެ ސިޔާސީ މަޤާމުތަކަށް އަދިވެސް ގިނަ ބަޔަކު އައްޔަންކުރަމުންދާ ކަމަށާއި، އެ މަޤާމުތަކުގެ އަދަދު މިހާރު 2,000 އާ ކައިރިކުރާނެ ކަމަށް ލަފާކުރެވޭ ކަމަށްވެސް އެމްޑީޕީން ބުނެފައިވެއެވެ.
އެމްޑީޕީން ވަނީ ސަރުކާރު ހިއްސާވާ ކުންފުނިތަކުގެ ވަޒީފާތަކުން މުވައްޒަފުން ވަކިކުރުން ހުއްޓާލުމަށް ގޮވާލާފައެވެ. އަދި ވަޒީފާއިން ވަކިކުރެވޭ ފަރާތްތަކަށް ވަޒީފާއާބެހޭ ޓްރައިބިއުނަލަށް މައްސަލަ ހުށަހެޅުމުގައި އެމްޑީޕީގެ ފަރާތުން އެހީތެރިކަން ފޯރުކޮށްދޭން ތައްޔާރަށް ތިބި ކަމަށްވެސް ބުނެފައިވެއެވެ.
