2017 ވަނަ އަހަރުގެ ޖުލައި 31 ވަނަ ދުވަހުގެ ރޭ މާލޭގައި މަރާލި ރ. މީދޫ/ ފެންފިޔާޒުގެ، މުޙައްމަދު އަނަސްގެ މަރުގެ މައްސަލައިގައި ދަށު ކޯޓުން ދަޢުވާލިބުނު މީހުން ސަލާމަތްވި މައްސަލައިގެ އިސްތިއުނާފީ ޝަރީޢަތް ހައި ކޯޓުގައި ފަށައިފިއެވެ.
މި މައްސަލައިގައި އަށް މީހެއްގެ މައްޗަށް ދަޢުވާ އުފުލާފައިވެއެވެ. އޭގެ ތެރޭގައި ހިމެނޭ ކުޑަކުއްޖެއްގެ މައްޗަށް ކުރި ދަޢުވާ ޖުވެނައިލް ކޯޓުން ސާބިތުނުވާ ކަމަށް ނިންމުމުން، ދައުލަތުން އެ މައްސަލަ ހައިކޯޓަށް ހުށަހެޅިއެވެ. ހައިކޯޓުން އެ ކުއްޖާގެ މައްޗަށް ކުށް ސާބިތުވާ ކަމަށް ނިންމައި، 18 އަހަރު ދުވަހުގެ މުއްދަތަށް ޖަލަށްލުމަށް ޙުކުމްކުރިއެވެ.
އަނަސް މަރާލި މައްސަލައިގައި ތިން މީހެއްގެ މައްޗަށް ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދަޢުވާ ކުރިއެވެ. އިތުރު ހަތަރު މީހެއްގެ މައްޗަށް ގަސްދުގައި މީހަކު މަރާލުމުގައި ބައިވެރިވުމުގެ ދަޢުވާ ކުރިއެވެ.
ކްރިމިނަލް ކޯޓުން މިދިޔަ ފެބްރުއަރީ މަހު މި މީހުންގެ މައްޗަށް ކުށް ސާބިތުނުވާ ކަމަށް ނިންމުމާ ގުޅިގެން، ދައުލަތުން ވަނީ ހައި ކޯޓުގައި މައްސަލަ އިސްތިއުނާފުކޮށްފައެވެ.
ހައި ކޯޓުގައި މިއަދު ފެށުނު އިސްތިއުނާފީ ޝަރީޢަތުގައި، ދަޢުވާލިބޭ ބައެއް މީހުން ވަކީލުން ހަމަޖެއްސުމަށް އެދުމުން، ފަނޑިޔާރުންގެ ބެންޗުން ހަފުތާއެއްގެ މުއްދަތު ދެއްވިއެވެ. އަދި ދެން އޮންނަ އަޑުއެހުމުގައި ވަކީލުން ނެތަސް މައްސަލަ ކުރިއަށް ގެންދަވާނެ ކަމަށް ވިދާޅުވިއެވެ.
ދަޢުވާލިބޭ މީހުން ބަންދުކުރުމަށް ދައުލަތުން އެދިފައިވާ ކަމަށާއި، އެކަމާމެދު ދެން އޮންނަ އަޑުއެހުމުގައި ގޮތެއް ނިންމަވާނެ ކަމަށް ފަނޑިޔާރުންގެ ބެންޗުން ވިދާޅުވިއެވެ.
މި މައްސަލަ ބައްލަވަނީ ފަނޑިޔާރު މުޙައްމަދު ޝަނީޒު، އިސް ފަނޑިޔާރު ޙުސައިން ޝަހީދު، އަދި ފަނޑިޔާރު މުޙައްމަދު ފައިޞަލެވެ. ބެންޗުގެ ރިޔާސަތު ބަލަހައްޓަވަނީ ފަނޑިޔާރު ޝަނީޒެވެ.
