އިނގިރޭސިވިލާތުގައި މުސްލިމުންނާ ދެކޮޅަށް ހިންގަމުންދާ ގިނަ މުޒާހަރާތަކާ ގުޅިގެން، އެ ގައުމުގައި ދިރިއުޅޭ އަދި ދަތުރުކުރާ ދިވެހިން ސަމާލުވުމަށް ފޮރިން މިނިސްޓްރީން އަނެއްކާވެސް އިލްތިމާސްކޮށްފިއެވެ.

މި ހަމަނުޖެހުންތައް ފެށުނީ ސައުތްޕޯޓުގައި ހިނގި ހިތާމަވެރި ހާދިސާއަކާ ގުޅިގެންނެވެ. އެއީ ކުޑަކުދިންގެ ޑާންސް އަދި ޔޯގާ ކްލާހަކަށް ވަޅިން ހަމަލާދީ، ކުޑަކުދިންތަކެއް މަރުވި ހާދިސާއެވެ. މި ހާދިސާއާ ގުޅިގެން މުސްލިމުންނާ ދެކޮޅަށް ސިލްސިލާ މުޒާހަރާތަކެއް ފަށާފައިވެއެވެ.

ފޮރިން މިނިސްޓްރީގެ ބަޔާނުގައި ބުނެފައިވަނީ، ޖުލައި 29 އިން ފެށިގެން މި ހަމަނުޖެހުންތައް ދަނީ ބަލަމުން ކަމަށެވެ. 100 އަށްވުރެ ގިނަ މުޒާހަރާ ރޭވިފައިވާ ކަމަށް ބުނެ، ދިވެހިންގެ ރައްކާތެރިކަމަށް ސަމާލުވުމަށް އިލްތިމާސްކޮށްފައިވެއެވެ.

މިނިސްޓްރީން އަންގާފައިވަނީ މުޒާހަރާތައް ބޭއްވޭ ސަރަހައްދުތަކުން ދުރުހެލިވުމަށާއި، އިނގިރޭސި ސަރުކާރާއި ދިވެހި ހައިކޮމިޝަނުގެ އިރުޝާދުތަކަށް ތަބާވުމަށެވެ. އަދި އެހީއެއް ބޭނުންވެއްޖެނަމަ ހައިކޮމިޝަނާ ގުޅުމަށްވެސް މިނިސްޓްރީން އެދިފައިވެއެވެ. މި ހާލަތުގައި ދިވެހިންގެ ރައްކާތެރިކަމަށް ސަމާލުވުމަކީ ވަރަށް މުހިންމު ކަމެއް ކަމަށް ފޮރިން މިނިސްޓްރީން ބާރުއަޅާފައި ވެއެވެ.