ސަރުކާރުގެ ކަމާބެހޭ އިދާރާތަކުން މަޖިލީހަށް ފޯރުކޮށްދޭންޖެހޭ މަޢުލޫމާތު ނުދީގެން ކޮމިޓީގައި ތިން ބިލެއްގެ މަސައްކަތް ކުރިއަށް ނުގެންދެވި އޮތްކަމަށް، ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުޤައްރިރު ޤާސިމް އިބްރާހިމް ވިދާޅުވެއްޖެއެވެ.
މިއަދު ބޭއްވުނު ކޮމިޓީގެ ބައްދަލުވުމުގައި ޤާސިމް ވިދާޅުވީ، ތިން ބިލަކަށް ކޮމެންޓް ކުރުމަށް ކަމާބެހޭ ދައުލަތުގެ އިދާރާތަކަށް ފޮނުވި ނަމަވެސް، އެ މަޢުލޫމާތު އަދި ކޮމިޓީއަށް ލިބިފައިނުވާ ކަމަށެވެ. އޭގެ ތެރޭގައި ދައުލަތުގެ ފިސްކަލް ޒިންމާގެ ބިލްގެ މަސައްކަތް ހިމެނެއެވެ.
ފިނޭންސް މިނިސްޓަރު ޑރ. މުޙައްމަދު ޝަފީޤު ވަނީ ބިލުގައި ހުރި ކަންބޮޑުވުންތަކަށް ކޮމެންޓް ކުރުމަށް އިތުރު ވަގުތަށް އެދިވަޑައިގެންފައިވާ ކަމަށް އިދާރީ މޭޒުން މަޢުލޫމާތު ދީފައިވެއެވެ. އަދި ސެންޓްރަލް ބޭންކުން ބިލަށް ފޮނުވާފައިވާ ކޮމެންޓްތަކަށްވެސް ބަދަލު އައިސްފައިވާނެ ކަމަށް މިނިސްޓަރު ވިދާޅުވެފައިވާކަމަށް ވެސް އިދާރީ މޭޒުން ބުނެފައިވެއެވެ.
ޤާސިމް ވިދާޅުވީ، ފިސްކަލް ޒިންމާގެ ބިލުގެ މަސައްކަތް މި މަހުގެ 13 ވަނަ ދުވަހަށް ނިންމުމަށް ސުންގަޑި ކަނޑައަޅާފައިވާ ކަމަށާއި، ނަމަވެސް ސަރުކާރުގެ އިދާރާތަކުން ލިބެންޖެހޭ މަޢުލޫމާތު ނުލިބި މިހާރު ހަތް ދުވަސްވެފައިވާ ކަމަށެވެ.
ކޮމިޓީގެ މެންބަރުން މި މައްސަލައާ ގުޅޭގޮތުން ތަފާތު ޚިޔާލުތައް ފާޅުކުރެއްވިއެވެ. ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު ހުށަހެޅުއްވީ، ކޮމެންޓްތައް ނުލިބުނު ނަމަވެސް ބިލުގެ މަސައްކަތް ކުރިއަށް ގެންދިއުމަށެވެ. ނަމަވެސް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހެޅުއްވީ، އިދާރާތަކުގެ ކޮމެންޓްތައް ލިބުމުން އަންނަ ހޯމަ ދުވަހު ބިލުގެ މަސައްކަތް ފެށުމަށެވެ.
ވޯޓަށް އެހުމުން، ކޮމިޓީން ފާސްކޮށްފައިވަނީ ޢަބްދުލްޣަފޫރުގެ ހުށަހެޅުއްވުމަށެވެ. އެހެންކަމުން، އިދާރާތަކުގެ ކޮމެންޓްތައް ލިބުމުން އަންނަ ހޯމަ ދުވަހު ބިލުގެ މަސައްކަތް ފެށުމަށް ނިންމައި، މިއަދުގެ ބައްދަލުވުން ވަނީ ނިންމާލާފައެވެ.
ކޮމިޓީގައި ފިސްކަލް ޒިންމާގެ ބިލުގެ އިތުރުން، ސޮވްރިން ޑިވެލޮޕްމަންޓް ފަންޑުގެ ބިލާއި ދައުލަތުގެ ދަރަންޏާބެހޭ ބިލުގެ މަސައްކަތްވެސް ވަނީ އަދި ނުނިމިއެވެ.
