ގާޒާގައި ވެރިކަން ކުރަންވާނީ ޕީ.އެލް.އޯއިން: އައްބާސް

ގާޒާ ސްޓްރިޕް ޝަރުޢީ ފަލަސްތީނު އޮތޯރިޓީތަކުގެ ބެލުމުގެ ދަށަށް ބަދަލުކުރަންޖެހޭނެ ކަމަށާއި، އެ ސަރަޙައްދު ވަގުތީގޮތުން ކޮންޓްރޯލް ކުރުމަށް އިސްރާއީލުން ރާވާފައިވާ ޕްލޭންތައް ބަލައިނުގަންނަ ކަމަށް ފަލަސްތީނުގެ ރައީސް މަޙުމޫދު އައްބާސް ރަޝިޔާގެ އާރު.އައި.އޭ ނިއުސް އޭޖެންސީއަށް ދެއްވި އިންޓަވިއުއެއްގައި ވިދާޅުވެއްޖެއެވެ. މި އިންޓަވިއު ޝާއިޢުކޮށްފައިވަނީ އަންގާރަ ދުވަހުއެވެ.

"ގާޒާ ވެރިކަން ކުރަންވާނީ ޕީ.އެލް.އޯ (ޕެލެސްޓައިން ލިބަރޭޝަން އޯގަނައިޒޭޝަން) އާއި ޝަރުޢީ ފަލަސްތީނު ސަރުކާރުގެ ބެލުމުގެ ދަށުން" އައްބާސް ސަރުކާރުގެ އާރު.އައި.އޭ އޭޖެންސީއަށް ދެއްވި އިންޓަވިއުގައި ވިދާޅުވިއެވެ.

މި އިންޓަވިއު ޝާއިޢުކޮށްފައިވަނީ ރަޝިއަން ބަހުންނެވެ. "އަޅުގަނޑުމެން ވަރަށް ބޮޑަށް ދެކޮޅު ހަދަނީ ބައެއް ވަގުތީ ޙައްލުތަކަށް މަގުފަހިވާގޮތަށް އިސްރާއީލުން އެކުލަވާލާފައިވާ ޕްލޭންތަކާ ދޭތެރޭގަ"

ހަމާސްގެ ލީޑަރު އިސްމާޢީލް ހަނިޔާ ޝަހީދު ކޮށްލުމުގެ މަޤްޞަދަކީ ގާޒާގެ ހަނގުރާމަ ދިގުދެމިގެންދިއުން ކަމަށް ފަލަސްތީނުގެ ރައީސް މަޙުމޫދު އައްބާސް ރަޝިއާގެ ސަރުކާރުގެ ނިއުސް އޭޖެންސީއަށް ވިދާޅުވިއެވެ. އަދި އޭނާ މޮސްކޯގައި ރައީސް ވްލަދިމީރު ޕުޓިންއާ އެކު ސަރަޙައްދީ ހަމަނުޖެހުމާ ބެހޭގޮތުން މަޝްވަރާކުރައްވާނެ ކަމަށްވެސް ވިދާޅުވިއެވެ.

ޑިޕްލޮމެޓިކް މަޞްދަރަކަށް ޙަވާލާދީ އާރު.އައި.އޭ އިން ބުނެފައިވާ ގޮތުގައި އައްބާސް އޮގަސްޓް 12 އިން 14 އަށް މޮސްކޯއަށް ދިގު މުއްދަތަކަށްފަހު ކުރައްވާ ޒިޔާރަތެއްގައި ވަޑައިގަންނަވާނެއެވެ.

ފަލަސްތީނު އިސްލާމިކް ގްރޫޕް ހަމާސްގެ ސިޔާސީ ލީޑަރު ހަނިޔާ އަވަހާރަކޮށްލީ ފާއިތުވި ހަފްތާގައި އީރާނުގެ ވެރިރަށް ޓެހުރާނުގައެވެ. މި ހަމަލާއާ ގުޅިގެން އިސްރާއީލަށް ބަދަލުހިފުމުގެ އިންޒާރުތައް ދެވިފައިވެއެވެ. އަދި ގާޒާގެ ހަނގުރާމަ މެދުއިރުމަތީގެ ފުޅާ ހަނގުރާމައަކަށް ބަދަލުވެދާނެކަމުގެ ކަންބޮޑުވުން އިތުރުވެފައިވެއެވެ.

އިންޓަވިއުގައި، އައްބާސް ވިދާޅުވީ ހަނިޔާ އަވަހާރަކޮށްލުމަކީ "ފިނޑި ޢަމަލެއް" ކަމަށް އޭނާ ދެކެވަޑައިގަންނަވާ ކަމަށެވެ.

"ހަނިޔާ އަވަހާރަކޮށްލުމުގެ މަޤްޞަދަކީ ހަނގުރާމަ ދިގުދެމިގެންދިއުމާއި އޭގެ ދާއިރާ ފުޅާކުރުންކަން ޝައްކެއްވެސް ނެތެވެ،" އޭނާ ވިދާޅުވިއެވެ. "މިހާރު ކުރިއަށްދާ މަޝްވަރާތަކަށް، އަނިޔާވެރިކަން ހުއްޓުވުމަށާއި އިސްރާއީލުގެ ސިފައިން ގާޒާއިން ފޭބުމަށް ކުރެވޭ މަސައްކަތްތަކަށް މީގެ ނޭދެވޭ އަސަރުކުރާނެ"

އޮކްޓޯބަރު 7، 2023 ގައި ހަނގުރާމަ ފެށުނީއްސުރެ ހަނިޔާއަކީ ހަމާސްގެ ބައިނަލްއަޤްވާމީ ޑިޕްލޮމަސީގެ މޫނުމަތިކަމުގައި ވެފައިވެއެވެ. އަދި ގާޒާގައި ހަނގުރާމަ ހުއްޓުވުމަށް ބައިނަލްއަޤްވާމީ މެދުވެރިކަމުގައި ކުރެވޭ މަސައްކަތުގައި ބައިވެރިވެވަޑައިގަންނަވަމުން ގެންދެވިއެވެ.

ގާޒާގައި އިސްރާއީލާ ދެކޮޅަށް ހިންގާ ހަނގުރާމައިގައި ހަމާސްއަށް އެހީތެރިވަމުންދާ އީރާނުން މި މަރުގެ ޒިންމާ އިސްރާއީލުގެ ބޮލުގައި އަޅުވައި، އެކަމަށް "އަދަބު" ދޭނެ ކަމަށް ބުނެފައިވެއެވެ. އިސްރާއީލުގެ އޮފިޝަލުން މިކަމުގެ ޒިންމާ ނަގާފައެއް ނުވެއެވެ.