މަދަނީ އުދުހުންތަކާބެހޭ ވުޒާރާއިން ކުރި އިއުލާނެއްގައި، ރާއްޖޭގައި ހެލިކޮޕްޓަރ ހިދުމަތް ފެށުމަށްޓަކައި އުޅަނދު އޮޕަރޭޓްކުރާނެ ފަރާތްތައް ހޯދުމަށް ޝައުގުވެރިކަން ފާޅުކުރުމުގެ (އެކްސްޕްރެޝަން އޮފް އިންޓްރެސްޓް) ފުރުސަތު ހުޅުވާލައިފިއެވެ.

މި ހިދުމަތުގެ މައިގަނޑު މަގުސަދުތަކުގެ ތެރޭގައި ހިމެނެނީ:
– ކުއްލި އެމަޖެންސީ ހާލަތްތަކުގައި އެހީތެރިވުން
– ފަތުރުވެރިކަމުގެ ސިނާއަތަށް އެހީތެރިވުން
– ރެޕިޑް މެޑިކަލް ރެސްޕޮންސްތަކަށް އެއަރ އެމްބިއުލާންސްގެ ހިދުމަތް ފޯރުކޮށްދިނުން
– ސާޗް އެންޑް ރެސްކިއު އޮޕަރޭޝަންތަކުގައި ބޭނުންކުރުން
– ރާއްޖޭގެ އެކި ކަންކޮޅުތަކުގައި ފަތުރުވެރިކަން އިޝްތިހާރުކުރުމަށް ކޮމާޝަލް ޕެސެންޖަރ ޓްރާންސްޕޯޓް ތައާރަފުކުރުން

ވުޒާރާއިން ހާމަކުރި ގޮތުގައި، މި ހިދުމަތް ދިނުމަށް ހޮވޭ ފަރާތަކަށް 10 އަހަރުގެ އެކްސްކްލޫސިވް ހައްގެއް ދިނުމަށް ވިސްނާފައިވެއެވެ. މީގެ ދަށުން ފަތުރުވެރިން އުފުލުމުގެ ހިދުމަތް ދިނުމުގެ ހުއްދަ ލިބިގެންދާނެއެވެ.

ރާއްޖޭގައި ހެލިކޮޕްޓަރ ހިދުމަތް ފެށުމުގެ ކުރިން، އިނގިރޭސިވިލާތުގެ ސިވިލް އޭވިއޭޝަން އޮތޯރިޓީ (ސީއޭއޭ) އިން ވަނީ ސަލާމަތާއި ރައްކާތެރިކަމާ ގުޅޭ ދިރާސާއެއް ހަދާފައެވެ. ވުޒާރާއިން ބުނާ ގޮތުގައި، ރާއްޖޭގައި ހެލިކޮޕްޓަރުގެ ހިދުމަތް ދޭނީ މި ދިރާސާގައި ކަނޑައަޅާފައިވާ މިންގަނޑުތަކާ އެއްގޮތްވާ ގޮތުގެ މަތިންނެވެ.