އާރްޑީސީގެ ކުރީގެ ހިންގުންތެރިން ލިޔެކިޔުމެއް ނެތި 161 މިލިއަން ރުފިޔާ އެކި ފަރާތްތަކަށް ޖަމާކޮށްފައިވާކަމަށް މިއަދު އެ ކުންފުނިން ހާމަކޮށްފިއެވެ. މި މަޢުލޫމާތު ހާމަކުރެވުނީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީން އާރްޑީސީގެ މާލީ ހާލަތާއި ކުންފުންޏަށް ލިބިފައިވާ ގެއްލުންތަކާ ގުޅޭގޮތުން ސުވާލުކުރުމުންނެވެ.
އާރްޑީސީން ބުނިގޮތުގައި 2022 ވަނަ އަހަރު 66 މިލިއަން ރުފިޔާ އަދި 2023 ވަނަ އަހަރު 95 މިލިއަން ރުފިޔާ އެއްވެސް ލިޔެކިޔުމެއް ނެތި އިންޓަނެޓް ބޭންކިންގ މެދުވެރިކޮށް އެކި ފަރާތްތަކަށް ޖަމާކޮށްފައިވެއެވެ. މި ފައިސާ ޚަރަދުކުރެވުނީ ކޮންކަމަކަށްކަން އެނގޭނެ އެއްވެސް ލިޔެކިޔުމެއް ނެތްކަމަށާއި، މި މުޢާމަލާތްތައް ފާހަގަކުރެވުނީ ކުންފުނީގެ ބޭންކް ސްޓޭޓްމަންޓް ބެލުމުން ކަމަށް ކުންފުނިން ހާމަކޮށްފައިވެއެވެ.
މި މައްސަލަ އޭސީސީއާއި ފުލުހުން ތަޙްޤީޤުކުރަމުންދާއިރު، އާރްޑީސީންވެސް އޮޑިޓެއް ކުރުމުގެ މަސައްކަތް ކުރަމުންދާކަމަށް ބުނެފައިވެއެވެ.
މީގެ އިތުރުން، މި މައްސަލައާ ގުޅިގެން ފައިނޭންސްގެ ބައެއް މުވައްޒަފުންގެ ޑިޕާޓްމަންޓް ބަދަލުކޮށް، ކުންފުނީގެ ސީއެފްއޯ މަޤާމުން ވަކިކޮށްފައިވާ ކަމަށާއި، މައްސަލަ ބެލުމަށްފަހު މިކަމުގައި ޝާމިލުވާ އިތުރު މުވައްޒަފުންނާމެދުވެސް ފިޔަވަޅު އަޅަމުންދާނެ ކަމަށް އާރްޑީސީން ބުނެފައިވެއެވެ.
