ޔޫކްރެއިނަށް އެމެރިކާގައި އުފައްދާ އެފް-16 ހަނގުރާމަ ވައިގެ އުޅަނދުތައް ލިބިއްޖެކަމަށް އުކްރެއިނުގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެއެވެ.
"އެފް-16 ފައިޓާރ ޖެޓްތައް ތިބީ ޔޫކުރެއިންގަ. އަޅުގަނޑުމެންނަށް މިކަން ކުރެވިއްޖެ،" ނަން ހާމަނުކުރާ ވައިގެ ބަނދަރެއްގައި ބޭއްވި ރަސްމިއްޔާތެއްގައި ދެ އެފް-16 އުޅަނދާއެކު ރައީސް ޒެލެންސްކީ ވިދާޅުވިއެވެ.
ޔޫކްރެއިނުގެ ވެރިޔާ، ކުރިން ފޯރުކޮށްދޭން ވަރަށް ޖެހިލުންވި އެއްޗެއް ދިނުމުން އެކުވެރި ޤައުމުތަކަށް ޝުކުރު އަދާކުރެއްވިއެވެ. ނަމަވެސް، އިތުރު ގިނަ އުޅަނދުތައް ބޭނުންވާކަމަށްވެސް އިތުރުކުރެއްވިއެވެ.
މި އުޅަނދުތައް ލިބުމަކީ، ސޯވިއެޓް ޒަމާނުގެ އުޅަނދުތަކަށް ގިނައިން ބަރޯސާވާ ޔޫކްރެއިނުގެ ވައިގެ ބާރުގެ ޤާބިލުކަން އިތުރުކުރުމަށް ލިބުނު މުހިންމު ކުރިއެރުމެކެވެ.
ކުރިއަށް އޮތް މަސްތަކުގައި އިތުރު އެފް-16 ތަކެއް ލިބޭނެކަމަށް އުންމީދުކުރެވޭ ކަމަށާއި، ނަމަވެސް އަދި މި ހުރިހާ އުޅަނދުތައް އުދުއްސާލާނެ ފުދޭވަރަކަށް ތަމްރީނު ލިބިފައިވާ ޕައިލެޓުން ނެތްކަމަށް ޒެލެންސްކީ އިޢުތިރާފުވެވަޑައިގަތެވެ.
ކިތައް އުޅަނދު އުކްރެއިނަށް ލިބުނުކަމެއް އޭނާ ސާފުކޮށް ވިދާޅެއްނުވިއެވެ. އަދި އެ ހުރިހާ އުޅަނދެއް ފޮނުވާފައިވަނީ ޑެންމާކު، ނެދަލެންޑްސް އަދި އެމެރިކާއިންކަމެއްވެސް ސާފުކޮށް ވިދާޅެއްނުވިއެވެ. ނަމަވެސް އޭނާ މި ޤައުމުތަކަށް ޚާއްޞަ ގޮތެއްގައި ޝުކުރު އަދާކުރެއްވިއެވެ.
2023 ވަނަ އަހަރުގެ އޯގަސްޓް މަހު އެމެރިކާގެ ރައީސް ޖޯ ބައިޑެން، އެކުވެރި ޤައުމުތަކަށް އެފް-16 އުކްރެއިނަށް ފޮނުވުމުގެ ހުއްދަ ދެއްވުމަށްފަހު، ނޭޓޯގެ ޤައުމުތަކުން ގާތްގަނޑަކަށް 65 އެފް-16 ފޯރުކޮށްދޭނެކަމަށް ވަނީ އިޢުލާނުކޮށްފައެވެ.
އެފް-16 ތަޢާރަފުކުރެވުނީ 1978 ގައެވެ. ގިނަ ހުޅަނގުގެ އަސްކަރިއްޔާތަކުން މިހާރު މި ދުވަސްވީ އުޅަނދުތައް ރިޓަޔަރކޮށް، 2015 ގައި ތަޢާރަފުކުރެވުނު އެމެރިކާގެ އެފް-35 އިން ބަދަލުކުރަމުންދެއެވެ.
އިނގިރޭސިވިލާތުގެ ވައިގެ ބާރުގައި އެފް-16 ތަކެއް ނެތްނަމަވެސް، އެފް-16 ތަކުގައި ހަރުކުރެވޭ ދުރަށް ދަތުރުކުރާ ސްޓޯމް ޝެޑޯ މިސައިލްތައް އުކްރެއިނަށް ފޯރުކޮށްދެމުންދެއެވެ.
