ކުއްލިއަކަށް އާއިލީ ކަމެއް ދިމާވުމުގެ ސަބަބުން ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. އަލީ ހައިދަރު މިއަދު މަޖިލީހަށް ވަޑައިނުގެންނެވޭނެ ކަމަށް މަޖިލީހުގެ ރިޔާސަތުން އިއުލާން ކުރައްވައިފިއެވެ.
މިއަދުގެ މަޖިލީހުގެ އެޖެންޑާގައި ވަޒީރު ހައިދަރު ވަޑައިގެން ހައުސިންގ ސްކީމްތަކާ ގުޅޭގޮތުން މެންބަރުންގެ ސުވާލުތަކަށް ޖަވާބުދެއްވުން އޮތެވެ. ވަޒީރު މަޖިލީހަށް ހާޒިރުކުރެއްވުމަށް ހުށަހެޅުއްވީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމެވެ.
މުޙައްމަދު އިބްރާހީމް ވަނީ ވަޒީރާ ކުރެއްވުމަށް ތިން ސުވާލެއް ތައްޔާރުކުރައްވާފައެވެ:
1. ގުޅީފަޅުން ބިން ލިބުނު ފަރާތްތަކަށް އިންވަކިކޮށް ބިން ހަވާލުކުރަން ފަށާނީ ކޮން ދުވަހަކުތޯ؟
2. ބިންވެރިޔާ ސްކީމުގެ ދަށުން ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން މާލޭ މީހުންނަށް ބޯހިޔާވަހިކަން ފޯރުކޮށްދިނުމަށް ދީފައިވާ ގޯތިތައް އޭގެ ވެރިފަރާތްތަކަށް ހަވާލުކުރެވޭނީ ކިހާހިސާބަކުތޯ؟
3. ހުޅުމާލޭގެ ދެވަނަ ފިޔަވަހީގައި އިމާރާތްކުރަމުންދާ 4،000 ފްލެޓް ކާމިޔާބުވީ ފަރާތްތަކަށް އެ ފްލެޓް ހަވާލުކުރެވޭނީ ކޮންއިރަކުތޯ؟
މިއަދުގެ މަޖިލިސް ފެށްޓެވުމާއެކު، މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވީ ކުއްލި އާއިލީ ކަމެއް ދިމާވުމުގެ ސަބަބުން ވަޒީރު ހައިދަރަށް މަޖިލީހަށް ވަޑައިގެންނެވެން ނެތްކަމަށެވެ.
އަދި މި ސުވާލުތައް ދެން އެންމެ އަވަހަށް އެޖެންޑާކުރެވެން އޮތް ދުވަހަކަށް އެޖެންޑާ ކުރައްވާނެ ކަމަށްވެސް ރައީސް ވިދާޅުވިއެވެ.
