އަނިޔާވެރި ގޮތަކަށް މަރާނި ރ. މީދޫ ފެންފިޔާޒުގެ މުހައްމަދު އަނަސް މަރާލިތާ ހަތް އަހަރުފުރުން ފާހަގަ ކުރުމުގެ ގޮތުން އެރަށް އެކީ އަނދިރި ކޮށްލައިފިއެވެ. މީދޫ އެކީ އަނދިރި ކޮށްލާފައިވަނީ އަނަސްގެ މަރަށް 7 އަހަރު ފުރިގެން ދިޔައިރު ވެސް އޭނާގެ މަރަށް އިންސާފު ލިބިފައި ނުވާތީ އަނަސްގެ ހަނދާނުގައެވެ.

އަނަސް އަނިޔާވެރިގޮތަކަށް މަރާލާފައިވަނީ ޖުލައި 31، 2017 ވަނަ ދުވަހުގެ ރޭ 9:15 އާއި 9:30 އާ ދެމެދުގެ ވަގުތެއްގައި މާލޭގެ ލިޓަސް ގަރާޖު ތެރޭގައެވެ.

އެގޮތުން ރޭ މީދޫ އަނދިރި ކޮށްލާފައިވަނީ، އެ ގަޑިއާއި ދިމާކޮށް ރަށުން 15 މިނިޓަށް ކަރަންޓު ކަނޑާލައިގެންނެވެ. އަދި ކަރަންޓު ކަނޑާލި ވަގުތުގައި އަނަސްގެ މަރަށް އިންސާފު ހޯދައިދިނުމަށް އެދި އަޑުއުފުލާފައިވެސް ވެއެވެ.

ކޮންމެ އަހަރަކުވެސް ޖުލައިމަހުގެ 31 ވަނަ ދުވަސް މީދޫގެ ރައްޔިތުން ހިތާމައިގެ އަނދިރި ދުވަހެއްގެ ގޮތުގައި ފާހަގަ ކުރެއެވެ.

އަނަސްގެ މަރުގެ މައްސަލައިގައި ދައުވާ ކުރީ، ދަފްތަރު ނަމްބަރު 1746 ސިމާހު މޫސާ އާއި ސ. ފޭދޫ ވެސްޓަންވިލާ ހަސަން މަހްފޫޒް އާއި ތ. ކިނބިދޫ ގުލްފާމުގޭ މުހައްމަދު ޝާޒް އާއި ލ. ގަން ތުނޑީ، ނަންނާރިގެ ޖުނައިހު އަބްދުﷲ އާއި މ. ދިމިޝްގު އުސްމާން ޝަރީފާއި ޅ. ކުރެންދޫ އަސުރުމާގޭ އަހުމަދު ޒަޔާނާއި މ. ލޮނުމިދިލިގޭ އަފްރާހު އަބްދުލް ރައްޒާގަށެވެ.

މީގެ ތެރެއިން ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވުމުގެ ދައުވާ އުފުލާފައިވާ މީހުންނަކީ:

ޖުނައިހު އަބްދުﷲ
ހަސަން މަހްފޫޒް
މުހައްމަދު ޝާޒް
ސިމާހް މޫސާ

ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާ ކުރި މީހުންނަކީ:

އަހްމަދު ޒަޔާން
އުސްމާން ޝަރީފް
އަފްރާހު އަބްދުއްރައްޒާގް

އެ މީހުންގެ ތެރެއިން މަހުފޫޒު ދޫކޮށްލާފައި ވަނިކޮށް، ފުލުހުން ކަނޑުމަތިން ހިންގި އޮޕަރޭޝަނެއްގައި މީގެ ކުރިން ވަނީ ހައްޔަރުކޮށްފައެވެ. އެ އޮޕަރޭޝަނުގައި ފުލުހުން ވަނީ މަސްތުވާތަކެއްޗާއި ގިނަ އަދަދެއްގެ ބަނގުރާފުޅި އަތުލައިގެންފައެވެ. އެހެންނަމަވެސް، މ. މުލީ ކޯޓުން ވަނީ ޝަތުރުކުރުމަށްފަހު މަހުފޫޒު ދޫކޮށްލައިފައެވެ.