ހުޅުމާލޭގައި ގަވާއިދާ ޚިލާފަށް ވިޔަފާރިކުރަމުންދިޔަ 22 ބިދޭސީއަކު އިމިގްރޭޝަނުން ހިންގި ބޮޑު އޮޕަރޭޝަނެއްގައި ހައްޔަރުކޮށްފިއެވެ.
އިމިގްރޭޝަނުން ބުނީ، މިއީ މިހާތަނަށް ހުޅުމާލޭގައި ހިންގުނު އެންމެ ބޮޑު އެއް އޮޕަރޭޝަން ކަމަށެވެ.
ރޭ ހިންގުނު މި އޮޕަރޭޝަނަކީ ސޯޝަލް މީޑިއާގައި ކަންބޮޑުވުން ފާޅުކޮށް، ހިއްސާކޮށްފައިވާ މަޢުލޫމާތާ ގުޅިގެން ކުރިއަށް ގެންދެވުނު އޮޕަރޭޝަނެކެވެ. މި އޮޕަރޭޝަނުގައި ހުޅުމާލެއިން 3 ބުރީގެ އިމާރާތެއް ބަލައި ފާސްކޮށްފައިވެއެވެ. މި އިމާރާތުގައި ކާބޯތަކެތީގެ ވިޔަފާރިކޮށް، ގަވާއިދާ ޚިލާފަށް މަސައްކަތް ކުރަމުންދިޔަ 22 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ.
އިމިގްރޭޝަނުން މަޢުލޫމާތު ދިންގޮތުގައި މި ތަނަކީ ދިވެހި އަންހެނަކާ ކައިވެނިކޮށްގެން އުޅޭ ބިދޭސީ ފިރިހެނަކާ ގުޅުން އޮތް ތަނެކެވެ. އަދި މި މައްސަލަ އިމިގްރޭޝަނުން ދަނީ މިހާރު ތަޙުޤީޤުކުރަމުންނެވެ.
މީގެ އިތުރުން، ގަވާއިދާ ޚިލާފަށް އުޅޭ ބިދޭސީން އަތުލައިގަތުމުގެ އޮޕަރޭޝަނެއް އިމިގްރޭޝަނުން ދަނީ ހިންގަމުންނެވެ. މިހާތަނަށް 130 އެއްހާ ބިދޭސީން ވަނީ އަތުލެވިފައެވެ. އަދި މި ބިދޭސީން ޑީޕޯޓުކުރުމަށް ވަނީ ނިންމާފައެވެ.
އިމިގްރޭޝަނުން ވަނީ ބިދޭސީން ހިންގާ ގަވާއިދާ ޚިލާފު ވިޔަފާރިތަކަށް ޚާއްޞަ ސަމާލުކަމެއް ދޭނެ ކަމަށް ބުނެފައެވެ. އަދި މިފަދަ ޤާނޫނާ ޚިލާފު ޙަރަކާތްތައް ހުއްޓުވުމަށް އިތުރު ފިޔަވަޅުތައް އަޅަމުންދާނެ ކަމަށްވެސް ބުނެފައިވެއެވެ.
