މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ އުސޫލުތައް ދައުލަތުގެ ކުންފުނިތަކުގެ މައްޗަށް ހިނގާ ގޮތަށް މައުލޫމާތު ހޯދައި ލިބިގަތުމުގެ ހައްގުގެ ގަވާއިދުގައި އޮތީ ރަނގަޅަށް ސުޕްރީމް ކޯޓުން ވެސް މިއަދު ހުކުމްކޮށްފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި، ސަރުކާރުގެ ކުންފުނިތަކުގެ މައްޗަށް އެ ގާނޫނުގެ އުސޫލުތައް ހިނގާނެ ކަމަކަށް ބުނެފައި ނެތް ނަމަވެސް އިންފޮމޭޝަން ކޮމިޝަނަރު އެކުލަވާލެއްވި މައުލޫމާތު ހޯދައި ލިބިގަތުމުގެ ގަވާއިދުގައި ސަރުކާރު ކުންފުނިތަކުގެ މައްޗަށް އެ ގާނޫނުގެ އުސޫލު ހިނގާނެ ކަމަށް ބުނެފައިވެ އެވެ.
އެމްޓީސީސީން ދައުވާކުރީ ގަވާއިދުގެ އެ މާއްދާއަކީ ގާނޫނާ ހިލާފު މާއްދާއެއް ކަމަށް ބުނެ، އެ މާއްދާ ބާތިލް ކުރުމަށެވެ. އެ މައްސަލާގައި ހައި ކޯޓުން ނިންމާފައި އޮތީ ގަވާއިދުގެ އެ ބައި ގާނޫނާ ހިލާފު ނޫން ކަމަށެވެ.
އެ މައްސަލަ އެމްޓީސީސީން ސުޕްރީމް ކޯޓުގައި އިސްތިއުނާފް ކުރުމުން އެ ކޯޓުން މިއަދު ކުރި ހުކުމުގައި ވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައި ދައުލަތުން އެހީ ލިބިގެންވާ ފަރާތްތަކުގެ މައްޗަށް އެ ގާނޫނުގެ އުސޫލުތައް ހިނގާނެ ކަމަށް ގާނޫނުގައި ބުނެފައިވާތީ އެކަން ތަފުސީލުކޮށް ދިނުމަށް ގަވާއިދުގައި އެފަދަ މާއްދާއެއް ހިމެނުމުގެ ބާރު އިންފޮމޭޝަން ކޮމިޝަނަރަށް އޮންނާނެ ކަމަށެވެ. އެހެންވެ، ގަވާއިދުގައި އެގޮތަށް ހިމެނުމަކީ ގާނޫނާ ހިލާފު ކަމެއް ކަމަށް ނުބެލެވޭ ކަމަށް ހުކުމުގައި ވެ އެވެ.
ނަމަވެސް ސަރުކާރު ކުންފުނިތަކުގެ މައްޗަށް އެ ގާނޫނުގެ އުސޫލު ހިނގާނެތޯ ބެލުމުގައި ސަރުކާރުގެ ކޮންޓްރޯލް އެ ކުންފުންޏެއްގެ މައްޗަށް އޮންނަ މިންވަރެއްގެ މައްޗަށް ރިއާޔަތް ކުރެވޭނެ ކަމަށް ހުކުމުގައިވެ އެވެ.
