އިރާގުގެ ބަޢުދާދުގައި ހުންނަ އެމެރިކާގެ އެމްބަސީއަށް ރޮކެޓް ހަމަލާތަކެއް ދިނުމާއި ގުޅިގެން، އިރާނާ ދެކޮޅަށް އަސްކަރީ ހަމަލާތަކެއް ދޭނެކަމުގެ އިންޒާރު، އެމެރިކާގެ ރައީސް ޑޮނަލްޑް ޓްރަމްޕް ދެއްވައިފިއެވެ.
މިހަފްތާގައި، ބައުދާދުގެ، ވަރުގަދައަށް ހިމާޔަތް ކުރެވިފައިވާ ގްރީން ޒޯންގައި ހުންނަ އެމެރިކާގެ އެމްބަސީއަށް އަމާޒުކޮށް ވަނީ ރޮކެޓްގެ އެތަކެއް ހަމަލާތަކެއް ދީފައެވެ. މިހަމަލާތަކާ ގުޅިގެން އިރާގުގައި އަނެއްކާވެސް ހަމަނުޖެހުންތައް އުފެދިގެން ހިގައިދާނެކަމުގެ ކަންބޮޑުވުން ވަނީ ވަރަށް ބޮޑަށް އުފެދިފައެވެ.
އިރާގުގެ އަސްކަރިއްޔާގެ ފަރަތުން ވާހަކަ ދެއްކި ބޭފުޅަކު ވިދާޅުވި ގޮތުގައި، އިރާގުގައި މަނާކުރެވިފައިވާ ޖަމާއަތަކުން ގްރީން ޒޯނަށް 8 ރޮކްޓް ފޮނުވާލައިގެން ދިން މިހަމަލާގައި، އިރާގުގެ ސެކިއުރިޓީ އޮފިސަރަކު މަރުވެ، ގްރީން ޒޯނުގައި ޕާކްކޮށްފަައި ހުރި ކާރުތަކާއި އަދި އިމާރާތްތަކަށްވެސް ގެއްލުން ވެފައިވާ ކަމުގައެވެ.
"ބަޢުދާދުގައި ހުރި، އަހަރުމެންގެ އެމްބަސީއަށްވަނީ އާދީއްތަ ދުވަހު، ރޮކެޓްގެ އެތަކެއް ހަމަލައެއް އަމާޒު ކޮށްފަ"، އެމެރިކާގެ އެމްބަސީއަށް އަމާޒުކޮށް ދިން ރޮކެޓް ހަމަލާތަކަށް ނިސްބަތްކޮށް، ޓްރަމްޕް ކުރެއްވި ޓުވީޓުގައި ވިދާޅުވެފައި ވެއެވެ. "މި ރޮކެޓްތައް އައީ ކޮންތާކުންކަން އިގޭތަ: އިރާނުން،" ޓްރަމްޕް ލިޔުއްވާފައި ވެއެވެ.
"މިހާރު އަހަރުމެންނަށް އަޑު އިވެމުން މިދަނީ، އިރާގުގައިތިބި އެމެރިކާ މީހުންނަށް އަމާޒުކޮށް އިތުރު ހަމަލާތައް ދޭނެކަމުގެ އަޑުތައް…މިއީ އަހަރެން އިރާނަށް ދޭ ނަސޭހަތެއް: އެމެރިކާގެ އެންމެ މީހަކު މަރުވިޔަސް، އޭގެ އަގު އިރާނުން އަދާ ކުރަންޖެހޭނެ. މިކަމާ ވިސްނާތި،" ޓްރަމްޕް ވިދާޅުވިއެވެ.
Our embassy in Baghdad got hit Sunday by several rockets. Three rockets failed to launch. Guess where they were from: IRAN. Now we hear chatter of additional attacks against Americans in Iraq… pic.twitter.com/0OCL6IFp5M
— Donald J. Trump (@realDonaldTrump) December 23, 2020
އެމެރިކާއިން އަވަހާރަ ކޮށްލާފައިވާ އިރާނުގެ ޖެނެރަލް، ގައްސާމް ސުލައިމާނީ އަވަހާރަކޮށްލިތަ 1 އަހަރު ފުމުގެ މުނާސަބާ އަންނަ ޖެނުއަރީމަހު 3 ވަނަ ދުވަހު ފާހަގަ ކުރުމަށް އިރާނުން ތައްޔާރު ވަމުންދާއިރު، ސުލައިމާނީގެ މަރުގެ ބަދަލު ހިފުމުގެ ގޮތުން، އިރާނުން އެމެރިކާގެ މަސްލަހަތުތަކަށް އަމާޒުކޮށް ވަރުގަދަ ހަމަލާތަކެއް ދީފާނެކަމުގެ ކަންބޮޑުވުން ވައިޓްހައުސްގެ އޮފިޝަލުންގެ މެދުގައިވަނީ އިންތިހާއަށް އުފެދިފައެވެ.
އެމެރިކާގެ އެމްބަސީއަށް އަމާޒުކޮށް އާދީއްތަ ދުވަހު ދީފައިވާ މިހަމަލާތަކާ ގުޅިގެންނައި، އަދި އެމެރިކާގެ ސަލާމަތަށް މިހާރު ކުރިމަތިވަމުންދާ ނުރައްކާތައް ކުޑަކުރުމަށްޓަކާ، އިތުރަށް އަޅާނެ ފިޔަވަޅުތަކާ ގުޅޭގޮތުން އެމެރިކާގެ ރައީސް ޓްރަމްޕަށް ލަފާ އެރުވުމަށްޓާކަ، އެކްޓިން ޑިފެންސް ސެކެޓްރީ ކްރިސް މިލަރ އާއި، ސެކެޓްރީ އޮފް ސްޓޭޓް މައިކް ޕޮމްޕިއޯއާއި އަދި ގައުމީ ސަލާމަތާބެހޭ މުޝީރު ރޮބަޓް އޮބްރިއަން ވައިޓްހައުސްގައި ބުދަ ދުވަހު ވަނީ ބައްދަލު ކުރައްވާފައެވެ.
އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވަނީ، ޑިސެމްބަރު މަހުގެ 20 ވަނަ ދުވަހު ބަޢުދާދުގައި ހުންނަ އެމެރިކާގެ އެމްބަސީއަށް އަމާޒުކޮށް ދީފައިވާ ރޮކެޓް ހަމަލާތަކަކީ، "ޔަގީނުންވެސް، އިރާނުން އެހީތެރިކަން ފޯރުކޮށްދޭ ޝިޢާ ހަގުރާމަވެރި ޖަމާއަތްތަކުން ދީފައިވާ ހަމަލާތަކެއް،" ކަމުގައެވެ.
"އިރާނުން އެހީތެރިކަން ފޯރުކޮށްދޭ ޝީޢައިންގެ ހަގުރާމަވެރި ޖަމާޢަތްތަކުން މިދޭ ރޮކެޓް ހަމަލާތަކުން އެމެރިކާގެ އެކަކު މަރުވިޔަސް، އެމެރިކާއިން އިރާނު ޒިންމާދާރު ކުރުވާނަން"، ސެންޓްރަލް ކޮމާންޑުގެ ތަރުޖަމާން ނޭވީ ކެޕްޓަން ބިލް އާބަން ވިދާޅުވިއެވެ.
އެހެންނަމަވެސް، އެމެރިކާ މިތުހުމަތުތައް، އިރާނުގެ ފޮރިންގ މިނިސްޓްރީގެ ތަރުޖަމާން ސައީދު ޚަތީބުޒާދެ ވަނީ ދޮގު ކުރައްވާފައެވެ.
We strongly refute @SecPompeo's irresponsible anti-#Iran accusations, which blatantly aim to create tension.
Iran rejects any attack on diplomatic missions.
The U.S. military presence is the source of instability in our region. No amount of spin can divert blame for its evils.
— Saeed Khatibzadeh (@SKhatibzadeh) December 21, 2020
ޑިސެމްބަރު 21 ވަނަ ދުވަހު އޭނާ ކުރެއްވި ޓުވީޓެއްގައި ވިދާޅުވެފައިވަނީ، އެމެރިކާގެ މިތުހުމަތުތަކަކީ، "މެދުއިރުމަތީގައި އަނެއްކާވެސް، ނުތަނަވަސްކަން އުފެއްދުމުގެ މަގުސަދުގައި" ދައްކަމުންދާ ވާހަކަތަކެއް ކަމުގައެވެ.
