އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުސް، މޭރީ ގްރޭސް އޮނެޑް ޕިނެޑާގެ މަރުގެ މައްސަލައިގައި، އޭނާގެ ފިރިމީހާ މާވިން އެސްވައި ވަރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ ހެކިބަސް ނެގުމުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމަކީ މި މައްސަލައިގެ ހެކިބަސް ނެގުމަށް ބޭއްވި އަޑުއެހުމެކެވެ. އެގޮތުން މިއަދުގެ އަޑުއެހުމުގައި ވަނީ މާވިންގެ އާއިލާ އުޅުނު އެޕާޓްމަންޓްގައި ކޮޓަރިއެއް ކުއްޔަށް ނަގައިގެން އުޅުނު ނަރުހެއްގެ ހެކިބަސް ނަގާފައެވެ.
އޭނާ ބުނީ، ޙާދިސާ ހިނގި ދުވަހު މޭރީގެ ބޭބެ އަންނާތީ ކައްކަން އުޅުނު ތަން ފެނިފައިވާ ކަމަށެވެ. އެއީ އެ ދުވަހުގެ ހެނދުނުކަމަށް ހެކިވެރިޔާ ބުންޏެވެ.
އޭނާއަކީ ކުއްޔަށް އުޅޭ މީހަކަށްވާތީ މާވިން އަދި މޭރީއާ އެހާ ގިނައިން ވާހަކަ ދައްކާ ނޫޅޭކަމަށްވެސް އެ ހެކިވެރިޔާ ބުންޏެވެ.
މޭރީ މަރާލާފައި ވަނީ 2021 ވަނަ އަަހަރުގެ އޮކްޓޯބަރު މަހުގެ 19ވަނަ ދުވަހުއެވެ. މި މައްސަލާގައި ލަމްހާގެ މައްޗަށް ދައުވާ ކުރަނީ އައިޖީއެމްއެޗްގައި މަސައްކަތް ކުރަމުންދިޔަ އޭނާ ފިރިމީހާ މާވިންއާ ގުޅިގެން މޭރީ މަރާލުމުގައި ބައިވެރިވި ކަމުގެ ތުހުމަތެވެ.
އަދި މާވިންގެ މައްޗަށް ދައުލަތުން އުފުލާފައިވަނީ ގަސްތުގައި މީހަކު މެރުމުގެ ކުށުގެ ދައުވާއެވެ. އަދި ލަމްހާގެ މައްޗަށް އިތުރު 3 ދައުވާއެއް އުފުލާފައިވެއެވެ. އެއީ އެނގިހުރެ މީހަކު މެރުމުގައި ބައިވެރިވުމާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދައުވާއެވެ.
