ހާފިޒުންނަށް ލިބޭ އިނާޔަތް ދެ ގުނަ ބޮޑުކުރަން ނިންމަވާފައިވާކަން ރައީސް މުއިއްޒު އިއުލާން ކުރައްވައިފިއެވެ.
ރައީސް މުއިއްޒު މިކަން އިއުލާން ކުރެއްވީ ޤުރުއާން ކިޔެވުމުގެ ގައުމީ މުބާރާތުގެ ނަތީޖާ ފާޅުކުރުމަށް މިރޭ އޮތް ރަސްމިއްޔާތުގައި ވާހަކަފުޅުދައްކަވަމުންނެވެ.
މިރޭގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ކީރިތި ޤުރްއާން ހިތުދަސް މީހުންނަކީ މީގެކުރިން އަތުގެ އިނގިލިން ގުނާލެވޭހާ މަދު ބައެއް ކަމަށާއި، އެހެންނަމަވެސް މިހާރު އެ އަދަދު އިތުރުވަމުން އަންނަކަމަށެވެ.
އަދި މިސަރުކާރުގެ އަމާޒަކީ ކީރިތި ޤުރްއާން ހިތުދަސް ހާފިޒުން އުފެއްދުމަށް ޚާއްސަކޮށްގެން ހޭދަކުރުން ކަމުގައިވެސް ރައީސް ވިދާޅުވިއެވެ.
އެ ކަމަށް ޓަކައި ވަސީލަތްތައް އިތުރުކުރެވޭނެ. އަދި ހާފިޒުންނަށް ލިބޭ އިނާޔަތް ދެ ގުނަޔަށް ބޮޑުކުރެވޭނެ.
ރައީސް ވިދާޅުވިއެވެ.
އޭގެއިތުރަށްވެސް، ވަރަށް އަވަސް މުއްދަތެއްގައި ކީރިތި ގުރުއާންއާ ބެހޭ ޚާއްސަ މަރުކަޒެއް ބިނާކުރުމަށް ބިމެއް ހަމަޖެހިގެންދާނެ ކަމުގައިވެސް ރައީސް ވިދާޅުވިއެވެ. ހާފިޘް ކަމުގެ ސަނަދު ހާސިލްކުރާ ދަރިވަރުންނަށް ސަރުކާރުން ދޭ ޚާއްސަ އިނާޔަތަކީ ކޮންމެ މަހަކުވެސް ލިބޭ އިނާޔަތެކެވެ. މިއިނާޔަތް ކަނޑައަޅަނީ ރައީސުލްޖުމުހޫރިއްޔާގެ ލަފާގެމަތިން ގުރުއާނާބެހޭ މަރުކަޒުންނެވެ.
