މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ)ގެ ތަރުޖަމާނަކަށް ވެލިދޫ ދާއިރާގެ މަޖިލިސް މެމްބަރު މުޙައްމަދު އައްބާސް ހަމަޖައްސައިފިއެވެ. މުހައްމަދު އައްބާސް އެޕާޓީގެ ތަރުޖަމާންގެ އިތުރުން ޕާޓީގެ ޕޮލިސީ އެންޑް ޑިވެލޮޕްމަންޓް ކައުންސިލްގެ ޗެއާޕާސަން ކަމަށްވެސް ވަނީ އައްޔަންކޮށްފައެވެ.
އޭގެ އިތުރުންވެސް އެމްޑީއޭއިންވަނީ އެޕާޓީގެ އޮނިގަޑުގެން އެހެން ބައެއް މަގާމްތަކަށްވެސް ބޭފުޅުން އައްޔަން ކޮށްފައެވެ.
އެގޮތުން ވުމެންސް ކައުންސިލްގެ ޗެއާޕާސަންއަކަށް ނާޒިރާ އިބްރާހިމް މަނިކު ވަނީ އައްޔަން ކޮށްފައެވެ. އަދި ޕާޓީގެ ޔޫތް ކައުންސިލްގެ ޗެއާޕާސަންކަން ހަމަޖައްސާފައި ވަނީ އަޙުމަދު ރީހާންއެވެ.
އޭގެ އިތުރުން ޕާޓީގެ މަގާމްތަކަށް ހަމަޖެއްސި ބައެއް ބޭފުޅުން:
- މީޑިއާ ކައުންސިލްގެ ޗެއާ ޕާސަންކަމުގެ މަގާމަށް އަލީ ފާރީޝް ޔޫސުފް
- ސޯޝިއަލް ޕްރޮޓެކްޝަން ކައުންސިލްގެ ޗެއާޕާސަން ކަމަށް އަބްދުލް ޤާދިރު މުޙައްމަދު
- އިސްލާމިކް ކަންކަމާ ބެހޭ އެންމެ މަތީ މަޖިލީހަށް އަޙުމަދު މާޖިދު
ރައްޔިތުންގެ މަޖިލީހުގައި އެމްޑީއޭ ތަމްސީލު ކުރަމުންދަނީ ދެ މެމްބަރުންނެވެ. އެއީ ދ. މީދޫ ދާއިރާގެ މެމްބަރުން އެމްޑީއޭގެ ރައީސް އަޙްމަދު ސިޔާމް މުޙައްމަދާއި ވެލިދޫ ދާއިރާގެ މެމްބަރު މުހައްމަދު އައްބާސްއެވެ.
އެމްޑީއޭއިން ވަނީ އެޕާޓީގެ މެމްބަރުން ގިނަ ބޮޑު ޕާޓީއަކަށް ހެދުމަށް ޓަކައި، ޕާޓީގެ ހިންގުން ހަރުދަނާކޮށް މެމްބަރުން އިތުރުކުރުމަށް މަސައްކަތް ކުރުމަށް މަޝްވަރާކޮށްފައެވެ.
