އެމެރިކާގެ ރައީސްކަން ކުރުމަށް ސިއްޙީ އަދި ނަފްސާނީ ހާލަތު ތަން ނުދޭކަމަށް އެމެރިކާގެ ގިނަ ބަޔަކު ދެކެމުންދާ އެގައުމުގެ މިހާރުގެ ރައީސް ޖޯބައިޑްން، ޔޫކުރެއިންގެ ރައީސް ޒެލެންސްކީއަށް ޕުޓިންގެ ނަމުން، އަދި އަމިއްލަފުޅު ނައިބު ރައީސް ކާމަލާ ހެރިސްއަށް ޓްރަމްޕްގެ ނަމުން މުޚާތަބް ކޮށްފިއެވެ.
ބައިޑްން ޔޫކުރެއިންގެ ރައީސް ޒެލެންސްކީއަށް ޕުޓިންގެ ނަމުން މުޚާތަބް ކޮށްފައިވަނީ ނޭޓޯގެ ސަމިޓްގެ ހަވާސާގައި ޒެލެންސްކިއާއެކު ބޭއްވުނު ނޫސްވެރިންގެ ބައްދަލުވުމުގައި ޒެލެންސްކީއަށް ޕޯޑިއަމަށް ދައުވަތު ދެމުން ބައިޑްން ޒެލެންސްކީއަށް މުޚާތަބު ކުރީ "ރައީސް ޕުޓިން" މިގޮތަށެވެ.
އެހެންނަމަވެސް އޭގެ ހަމަ ކުޑައިރުކޮޅެއް ފަހުން، ޒެލެންސްކިއާއި މުޚާތަބް ކުރެވުނީ ރަގަޅަށް ނޫންކަމަށް އަމިއްލަފުޅަށް ވަޒަން ކުރެއްވުމާއެކު ބައިޑްން ވަނީ ވާހަކަ އޮޅުވާލެއްވުމަށް، އެއީ "ދޮށީ ޕުޓިން" ކަމަށް ވިދާޅުވެއް، އަލުން ޒެލެންސްކީގެ ނަން ވިދާޅުވެ އޭނާއަށް ޕޯޑިއަމަށް ދައުވަތު ދެއްވާފައެވެ.
ހަމައެއާއެކު ނޫސްވެރިންގެ ބައްދަލުވުމުގައި، ބައިޑްންގެ ބަދަލުގައި އެމެރިކާގެ ރައީސްކަމަށް ނައިބު ރައީސް ކާމަލާ ހެރިސް ރަގަޅު ނުވާނެތޯ ނޫސްވެރިޔަކު ކުރި ސުވާލަށް ޖަވާބު ދެމުން ބައިޑްން ވިދާޅުވީ "ނައިބު ރައީސް ޓްރަމްޕް" ނައިބް ރައީސް ކަމަށް އިޚްތިޔާރު ކުރެއްވީ ނައިބް ރައީސް ރައީސްކަމަށްވެސް ކަމުދާނެތީ ކަމުގައެވެ. ބައިޑްންގެ ވާހަކާގައި އޭނާ މޭރުން ކޮށްފައިވަނީ ނައިބު ރައީސް ކާމަލާ ހެރިސްއަށެވެ.
އެމެރިކާގެ ރައީސްކަން ކުރެއްވޭވަރަށް ބައިޑްންގެ ސިއްޙި އަދި ނަފްސާނީ ހާލަތު މިހާރު ތަން ނުދޭކަމަށްބުނެ، އޭނާ ނިސްބަތްވާ ޑިމޮކްރެޓިކް ޕާޓީގެ ގިނަ އިސްފަރާތްތަކުން ދަނީ ރިޔާސީ ރޭހުން ބައިޑްން ދުރަށް ވަޑައިގަތުމަށް ގޮވާލަމުންނެވެ.
އެހެންނަމަވެސް ބައިޑްން ވިދާޅުވަމުން ގެންދަވަނީ ރިޔާސީ ރޭހުގައި އޭނާ ދެމި ހުންނަވާނެކަމަށާއި، އަދި ޓްރަމްޕް ބަލިވެސް ކުރައްވާނެކަމުގައެވެ.
