އިނގިރޭސި ވިލާތުން ރާއްޖެ އަށް ކަނޑައަޅާފައި ހުންނަވާ އޮނަރަރީ ކޮންސުލް ޑރ ޕޯލް އާރްތާ ވަން ޑްރީޝްގެ ސައިކަލު ވަގަށް ނެގި މައްސަލައިގައި މީހަކު ނުވަ މަހަށް ޖަލަށްލުމަށް ކްރިމިނަލް ކޯޓުން އިއްޔެ ހުކުމްކޮށްފިއެވެ.
އެ މައްސަލައިގައި ކުށްވެރިވީ ރ.ކަނދޮޅުދޫ، ދޮންވެލި، އަހުމަދު އިރުޝާންއެވެ. ރާއްޖޭގައި ހުންނަވާ އިނގިރޭސިވިލާތުގެ އޮނަރަރީ ކޮންސުލް ޑރ. ޕޯލް އާރްތާ ވަން ޑްރީޝްގެ ސައިކަލު ވަގަށް ނަގާފައި ވަނީ މިދިޔަ އަހަރުގެ ނޮވެމްބަރު މަހުގެ 14 ވަނަ ދުވަހުއެވެ.
ދައުލަތުން އޭނާގެ މައްޗަށް ކުރީ ސައިކަލު ވަގަށް ނެގުމާއި ސައިކަލުގެ މަޑިދަށުގައި އޮތް އައިނެއް ވަގަށް ނެގި މައްސަލައިގައެވެ. އިރުޝާން ވަނީ އޭނާއާ ދެކޮޅަށް ކުރި ދެ ދައުވާއަށް އިއުތިރާފްވެ، ދައުލަތާ އެކީގައި އިއުތިރާފް އެއްބަސްވުމެއް ހަދައިފައެވެ.
ދައުލަތާ އެކީގައި އިއުތިރާފް އެއްބަސްވުމެއް ހަދާފައިވާތީ މައްސަލަ ބެއްލެވި ގާޒީ އާމިނަތު އަޒްލިފާ ވަނީ ބަންދުގައި އޭނާ ހޭދަކޮށްފައިވާ މުއްދަތު އުނިކުރުމަށްފަހު 10 މަހާއި 8 ދުވަހަށް ޖަލަށްލާން ހުކުމް ކޮށްފައެވެ.
