ޑިކްލިއާނުކޮށް، ނުވަތަ ކަސްޓަމަށް ނާންގާ ރާއްޖެއަށް ނަގުދު ފައިސާ އެތެރެކޮށް ބޭރުކުރެވޭނެ އަދަދު 10000 ޑޮލަރަށް ދަށްކޮށްފި އެވެ.
މަނީ ލޯންޑަރިންއާއި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނުގެ ދަށުން އެކުލަވާލާފައި ވާ "ދިވެހިރާއްޖެއަށް އެތެރެކުރާ ނުވަތަ ދިވެހިރާއްޖެއިން ބޭރުކުރާ ނަގުދު ފައިސާ ރިޕޯޓްކުރަންޖެހޭ އަދަދު ކަނޑައެޅުމުގެ ގަވާއިދު" މިދިޔަ ޖަނަވަރީ މަހު ބަދަލު ކުރިފަހުން އެންމެ ގިނަ އަދަދަކަށް ޑިކްލިއާނުކޮށް އުފުލޭނީ 20000 ޑޮލަރުގެ ނަގުދު ފައިސާއެވެ.
ނަމަވެސް މަރުކަޒީ ބެންކު އެމްއެމްއޭގެ އެ ގަވާއިދަށް އިއްޔެ ގެނައި އިސްލާހުގައި ވާގޮތުން ދެން އެންމެ ގިނަ އަދަދަކަށް ނަގުދުފައިސާގެ ގޮތުގައި އެތެރެ ނޫނީ ބޭރު ކުރެވޭނީ 10000 ޑޮލަރު ކަމަށެވެ. އަދި ނަގުދު ފައިސާ ހުރީ އެ އަދަދަށްވާ ދިވެހި ރުފިޔާ ނޫނީ ބޭރުގެ އެހެން ފައިސާ އަކުން ކަމަށް ވިޔަސް ކަސްޓަމުން ޑިކްލިއާ ކުރަންޖެހޭނެ ކަމަށް އެމްއެމްއޭއިން ގަވައިދަށް ގެނެސްފައިވާ އިސްލާހުގައި ބުނެފައިވެއެވެ.
ގަވައިދަށް ގެނެސްފައިމިވާ ބަދަލަށް އަމަލުކުރަން ފަށާނީ އަންނަ މަހުގެ 17ވަނަ ދުވަހުން ފެށިގެން ކަމަށް އެމްއެމްއޭގެ އިއުލާނުގައި ވެއެވެ.
ގަވާއިދަށް މިއަހަރު ޖަނަވަރީ މަހު އިސްލާހް ގެނައުމުގެ ކުރިން ޑިކްލިއާނުކޮށް ރާއްޖެއަށް އެންމެ ގިނަ އަދަދަކަށް އެތެރެކުރެވޭގޮތަށް އޮތީ 300،000 އެމެރިކާ ޑޮލަރުގެ ނަގުދު ފައިސާއެވެ.
ފައިސާ އެތެރެކޮށް ބޭރުކުރުމުގައި ކަސްޓަމަށް ސައްހަ ނޫން މައުލޫމާތު ދީފި ނަމަ ނުވަތަ އެ ފައިސާއަކީ މަނީލޯންޑަރިން ނޫނީ ޓެރަރިޒަމަށް ހަރަދުކުރުމަށް ބޭނުންކުރާ ފައިސާއެއް ކަމަށް ޝައްކުވާ ފައިސާ ހިފެހެއްޓުމުގެ ބާރު ގާނޫނީ ގޮތުން ކަސްޓަމަށް ލިބިގެންވެއެވެ.
