މާލެ ސަރަހައްދުގައި އާދަޔާ ޚިލާފަށް ހަރަކާތްތެރި އަށް ގޭންގެއް އުޅެމުންދާ ކަމަށައި، އެގޭންގުތަކުގެ ގިނަ މެމްބަރުންނަކީ 12 އަހަރާއި 13 އަހަރުގެ ކުޑަކުދިން ކަމުގައި ފުލުހުންގެ މުވައްސަސާއިން ބުނެފިއެވެ.
ޕަބްލިކް ސަރވިސް މީޑިއާ (ޕީއެސްއެމް)ގެ "ރާއްޖެ މިއަދު" ޝޯގައި ހޯމަ ދުވަހުގެ ރޭ ދެއްކެވި ވާހަކަފުޅުގައި ސްޕްރިންޓެންޑެންޓް އޮފް ޕޮލިސް އާރިފް ވިދާޅުވީ 2000 ވަނަ އަހަރުން ފެށިގެން އޯގަނައިޒްޑް ކްރައިމްގެ މައްސަލަތައް ފުލުހުން ނަށް ހުށަހަޅާފައިވާ މިންވަރު އިތުރުވެފައިވާ ކަމަށެވެ.
އަދި އޭގެ ފަހުން އައި އަހަރުތަކުގައި ގޭންގުތަކުގެ ގޮތުގައި ލިސްޓުކުރެވިފައިވާ ގިނަ ގުރޫޕްތަކެއް އުފެދި، އެކި ފަހަރު މަތިން އިތުރުވަމުން އަންނަ ކަމަށް އޭނާ ވިދާޅުވި އެވެ. އާރިފް ވިދާޅުވީ ކުރީގެ ބައެއް ގޭންގުތައް މިހާރު އެހާ އެކްޓިވް ނޫން ކަމަށެވެ.
ފުލުހުން ބުނީ މާލެ އާއި ހުޅުމާލޭގައި މިވަގުތު "ވަރަށް ހަރަކާތްތެރި" އަށް ކުށުގެ ގޭންގު ހަރަކާތްތެރިވާ ކަމަށެވެ. "އަށް ގޭންގް އެބަހުރި، ކުށެއް ނުވަތަ ގޭންގް މާރާމާރީއެއް ހިނގައިފިނަމަ، އެ މީހުން ތިބޭ ސަރަހައްދުތައް ޕެޓްރޯލްކޮށް މޮނިޓާކޮށްގެން އަޅުގަނޑުމެން އަބަދުވެސް ބަލަހައްޓަން ޖެހޭ. ކޮންމެ ދުވަހަކު ވެސް އެކަންކަން ބަލަހައްޓަން ޖެހޭ. އެމީހުންގެ އަމަލުތައް މޮނިޓާ ކުރަން އެބަޖެހޭ،" އާރިފް ވިދާޅުވި އެވެ.
އާރިފް ވިދާޅުވީ މާލެއިން ބޭރުގައި އާބާދީ ބޮޑު ރަށްރަށުގައި ވެސް ގޭންގުތައް ހަރަކާތްތެރިވަމުންދާ ކަމަށާއި އޭގެ ތެރޭގައި މާލޭގައި ދިރިއުޅޭ ގޭންގުތަކުގެ މީހުން ހިންގާ ގޭންގުތައް ވެސް ހިމެނޭ ކަމަށެވެ. "އައްޑޫގައި އެކަނި ވެސް ގާތްގަނޑަކަށް ހަ ގޭންގް ހިންގާކަމަށް ރަޖިސްޓްރީ ކުރެވިފައި ވޭ،" އޭނާ ވިދާޅުވި އެވެ.
އާރިފް ވިދާޅުވީ އެކި ގޭންގުތަކުގެ މެމްބަރުންގެ އަދަދު ތަފާތު ކަމަށެވެ. އޭނާ ވިދާޅުވީ އެކްޓިވް ގޭންގުތަކުގެ 25-150 އާ ދެމެދުގެ އަދަދެއްގެ މީހުން ފުލުހުންނަށް ދެނެގަނެވިފައިވާ ކަމަށެވެ. އޭނާ ވިދާޅުވި ގޮތުގައި ބޮޑެތި ގޭންގުތަކުގައި 18 އަހަރުން ދަށުގެ 50 އަށް ވުރެ ގިނަ މެމްބަރުން އެބަތިއްބެވެ.
އާރިފް ވިދާޅުވީ ގޭންގް ކުށްތަކާ ދެކޮޅަށް މަސައްކަތް ކުރުމަކީ ފުލުހުން ވަރަށް ބޮޑަށް ސަމާލުކަން ދޭ ދާއިރާއެއް ކަމަށެވެ. ގޭންގް ކްރައިމް އެންފޯސްމަންޓް ޔުނިޓް – ގޭންގް ކްރައިމް އާ ދެކޮޅަށް މަސައްކަތް ކުރުމަށް ހާއްސަ ޔުނިޓެއް – މި މަހުގެ ކުރީކޮޅު ފުލުހުން ވަނީ ކުރިއަށް އޮތް އަހަރުތަކަށް އާ ސްޓްރެޓެޖިކް އެކްޝަން ޕްލޭނެއްގެ ދަށުން އުފައްދައިފަ އެވެ.
މިދިޔަ މަހު ހޯމް މިނިސްޓަރު އަލީ އިހުސާން ވިދާޅުވީ ކްރައިމް ފޯކަސްޑް ޕޮލިސިންއަށް އިސްކަންދޭ މައިގަނޑު 10 ދާއިރާއެއް ޕްލޭންގައި ފާހަގަކޮށްފައިވާ ކަމަށެވެ. އޭނާ ވިދާޅުވީ އެންމެ ބޮޑު އިސްކަމެއް ދެނީ އޯގަނައިޒްޑް ކްރައިމް ނައްތާލުމަށް ކަމަށެވެ. "އަޅުގަނޑުމެންގެ އަމާޒަކީ ފަސް އަހަރު ނިމޭއިރު ރާއްޖޭގައި ހަރަކާތްތެރިވާ 10 ގޭންގު ތިން ގޭންގަކަށް ކުޑަކުރުމެއް ނޫން. އަޅުގަނޑުމެންގެ އަމާޒަކީ 10 ގޭންގް ވެސް ފޮހެލުން،" އޭނާ ވިދާޅުވި އެވެ.
އިހުސާން ވިދާޅުވީ ކުށްކުރާ ގޭންގުތަކާ ގުޅުން ހުރި 400 އެއްހާ ކުޑަކުދިން ރާއްޖޭގެ އެކި ކަންކޮޅުތަކުގައި ދެނެގަނެވިފައިވާ ކަމަށެވެ.
ކޮމެންޓު ފޮނުވާ