މަޖީދިއްޔާ ސްކޫލް ސަރަހައްދުގައި ހުރި ސްޓެލްކޯގެ ސަބްސްޓޭޝަނެއްގެ ކަރަންޓު ކޭބަލެއް ބުރިކޮށްލައިގެން އެތަކެތި ވަގަށް ނެގި މައްސަލައިގައި ހައްޔަރު ކުރި މީހާގެ ބަންދަށް 15 ދުވަސް ޖަހައިފިއެވެ.
ފުލުހުން ބުނީ އެމީހާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ބަންދަށް 15 ދުވަސް ޖަހާފައިވާ ކަމަށެވެ. އެ މައްސަލައިގައި ހައްޔަރު ކުރީ އުމުރުން 32 އަހަރުގެ ދިވެހި ފިރިހެނެކެވެ.
މަޖީދިއްޔާ ސްކޫލް ސަރަހައްދުގައި ހުންނަ ސްޓެލްކޯގެ ސަބްސްޓޭޝަނެއްގެ ކަރަންޓު ކޭބަލެއް ބުރިކޮށްލައިގެން އެތަކެތި ވަގަށް ނެގި މައްސަލައެއް ފުލުހުންނަށް ރިޕޯޓުކުރީ މިދިޔަ އަންގާރަ ދުވަހުއެވެ.
އެ ކޭބަލް ވަގަށް ގެންދިއުމުން މަޖީދިއްޔާ ސްކޫލާއި ހެންވޭރު އަބަދަށްފެހިމަގާއި މެދުޒިޔާރަތް މަގާއި ކަޅުހުރާމަގު އަދި ކަރަންކާ މަގުގެ ބައެއް ގެތަކުން ކަރަންޓު ހިދުމަތް މެދުކެނޑުނެވެ.
މި ފަހަކަށް އައިސް، މާލެ ސަރަހައްދުގައި އަޅާފައި ހުންނަ ކަރަންޓު ކޭބަލް ބުރިކޮށް ވަގަށް ގެންދިއުމުގެ މައްސަލަ ވަނީ ބޮޑުވެފައެވެ.
