މިއަހަރުގެ ޙައްޖުގެ އަޅުކަން އަދާކުރުމަށް ދިޔަ ދިވެހި ޙައްޖުވެރިންގެ ފަހު ގްރޫޕް މިއަދު މާލެ އަންނާނެއެވެ. މި ގުރޫޕުގައި ރާއްޖެ އައުމަށް ރޭ ޖިއްދާ އެއަރޕޯޓުން ފުރާފައިވަނީ 137 ހައްޖުވެރިންނެވެ. މި ފްލައިޓުގައި އަންނަ ހައްޖުވެރިންނަށް މާލެ އާދެވޭނީ ހަވީރުގެ ވަގުތެއްގައެވެ.
މިއަހަރު ހައްޖަށްދިޔަ ރާއްޖޭގެ ހައްޖުވެރިންގެ 3 ފްލައިޓެއް މީގެކުރިން ވަނީ ރާއްޖެ އައިސްފައެވެ.
ރާއްޖެއިން މިއަހަރު ޙައްޖަށް ދިޔަ މީހުން އެނބުރި އައުމަށް ހަމަޖެހިފައިވަނީ 4 ގްރޫޕަކަށް ބަހާލައިގެންނެވެ. ފުރަތަމަ ގްރޫޕްގެ ހައްޖުވެރިން ފާއިތުވި ޖޫންމަހުގެ 24 ވަނަ ދުވަހު އައިސްފައިވާއިރު އެ ގްރޫޕްގައި 296 މީހަކު ހިމެނެއެވެ. އަދި މިމަހުގެ 1 ވަނަ ދުވަހުގެސް ހައްޖުވެރިންގެ ގުރޫޕެއް ރާއްޖެ އައިސްފައި ވެއެވެ.
މިއަހަރު ރާއްޖެއިން ޙައްޖުގެ އަޅުކަން އަދާކުރުމަށް 1150 މީހަކު ޙައްޖު ކޯޕަރޭޝަންގެ ހަވާލުގައި މައްކާއަށް ގޮސްފައެވެ. އޭގެ ތެރެއިން 1149 މީހަކު ޙައްޖުގެ އަޅުކަން ވަނީ އަދާކޮށްފައެވެ.
މިއަހަރުގެ ޙައްޖުގެ އިންތިޒާމްތައް ކުރިއަށްދިޔައީ އެހެން އަހަރުތަކަށްވުރެ މާ ފުރިހަމައަށްކަމަށާއި، އެގޮތަށް އެއިންތިޒާމުތައް ކުރިއަށްގެންދިއުމަށް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވަރަށް ޚާއްސަ އަޙަމިއްޔަތުކަމެއް ދެއްވިކަމަށް މޯލްޑިވްސް ޙައްޖު ކޯޕަރޭޝަނުން ބުނެއެވެ.
ކުރިއަށް އޮތްތަނުގައި ޙައްޖުގެ ކަންކަން ރަނގަޅުކުރުމަށް ކުރަންޖެހޭ ކަންކަން ފާހަގަވެފައިވާތީ އެކަންކަން ހައްލުކުރުމަށް މަސައްކަތް ކުރައްވާނެކަމަށްވެސް ޙައްޖު ކޯޕަރޭޝަނުން ބުނެއެވެ.
