ޅ. ފެލިވަރުގައި 100 ޓަނުގެ، ދަޅު ބަންދުކުރާ ތަނެއް ގާއިމްކުރަން ނިންމައި އޭގެ ޑިޒައިން މަސައްކަތް ފަށައިފި އެވެ. މިފްކޯއިން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ މިފްކޯގެ މައި ޕްރޮޑަކްޝަން ހަބު ކަމުގައިވާ ފެލިވަރު ބޮޑުކުރުމުގެ މަޝްރޫއުގައި ހިމެނޭ ކޭނަރީގެ ޑިޒައިން މަސައްކަތް ޗައިނާ ކުންފުންޏާކާ ހަވާލުކޮށްގެން ފަށާފައިވާ ކަމަށެވެ.
މިފްކޯއިން ބުނީ މިއީ ކޮންޓްރެކްޓާ ފައިނޭންސްގެ އުސޫލުން 40 މިލިއަން ޑޮލަރު ހަރަދުކޮށްގެން ކުރިއަށްގެންދާ ޕްރޮޖެކްޓެއް ކަމަށެވެ. އަދި މި ޕްރިޖެކްޓުގެ އަމާޒަކީ 2026ގެ ނިޔަލަށް ޕްރޮޖެކްޓް އެއްކޮށް ނިންމުންކަމަށާއި، އާ ކޭނަރީގެ ސަބަބުން ފެލިވަރުގެ އޮޕަރޭޝަންގެ އެފިޝެންސީގެ އިތުރުން ޕްރޮޑަކްޝަން ކެޕޭސިޓީ ބޮޑު ތަނުން އިތުރުވެގެން ދާނެކަމުގައި މިފްކޯއިން ބުނެފައި ވެއެވެ.
އޭގެ އިތުރުން މި ފެކްޓްރީގެ ސަބަބުން ރާއްޖޭގައި ބާނާ ކަޅުބިލަމަހާއި ކަންނެލީގެ އިތުރުން އެހެނިހެން އުފެއްދުންތައް އިތުރުވެގެންދާނެ ކަމަށާއި، އަލަށް ގާއިމްކުރާ ކޭނަރީ އަކީ އޮޓޮމެޓިކް ތަނެއްކަމުން، މަސްދަޅު ބަންދުކުރުމާއި ލޭބަލް ޖެހުމާއި ޕެކިންގެ އިތުރުން، ގުދަން ކުރުމުގެ މަސައްކަތް ހިނގާނީ މެޝިނަރީތަކުގެ ޒަރީއާއިންކަމަށްވެސް ބުނެފައި ވެއެވެ.
ކޭނަރީގެ އިތުރުން ފެލިވަރުގެ ކޯލްޑް ސްޓޯރޭޖް މަސައްކަތް ވެސް ވަނީ އިންޑިއާގެ ކުންފުންޏަކާ ހަވާލުކޮށްގެން ކުރަމުންނެވެ. މިފްކޯއިން ބުނެފައިވަނީ އެ މަޝްރޫއުގެ ސަބަބުން އުތުރުގެ މަސްވެރިންނަށް ފަސޭހަކަމާ އެކު ސީދާ ފެލިވަރަށް މަސް ކިރޭނެކަމަށާއި، އެ މަޝްރޫއުގެ ދަށުން ގާއިމްކުރަނީ 4000 ޓަނުގެ ކޯލްޑް ސްޓޯރޭޖެއް ކަމުގައެވެ.
އޭގެ ނަތީޖާއެއްގެ ގޮތުން 200 ޓަނުގެ ބްރައިން ފްރީޒިން އާއި 80 ޓަނުގެ އާރުއެސްޑަބްލިއު ސިސްޓަމެއް ގާއިމްކުރެވޭއިރު، ފެލިވަރަށް ދުވާލެއްގެ މައްޗަށް 280 ޓަނުގެ މަސް އިތުރަށް ކިރޭނެކަމަށް މިފްކޮއިން ބުނެފައި ވެއެވެ. މި މަޝްރޫއަށް ސަރުކާރުން 22 މިލިއަން ރުފިޔާ ހަރަދުކުރަން ނިންމާފައިވެއެވެ.
އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ހަރަދުކޮށްގެން ހިންގަން ނިންމި މި މަޝްރޫއު އިންޑިއާގެ ކުންފުންޏެއް ކަމުގައިވާ ރައިނެކް އިންޑިއާ ލިމިޓެޑާ ހަވާލުކޮށްފައިވަނީ އީ މިދިޔަ އަހަރުގެ ޖެނުއަރީމަހުގެ 18 ވަނަ ދުވަހުއެވެ.
ކޮމެންޓު ފޮނުވާ