ރައީސް ޑރ. މުހައްމަދު މުއިއްޒު، އިސް ކުރައްވަނީ ސިޔާސީ ވިސްނުންފުޅަށްވުރެ ގައުމީ ވިސްނުންފުޅެއް ކަމުގައި ފިޝަރީޒް އެންޑް އޯޝަން ރިސޯސަސް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.
ސަރުކާރުގެ ހަރަދުތައް ކުޑަކުރުމަށް ރައީސް ޑރ. މުއިއްޒު އަޅުއްވަން ނިންމެވި ފިޔަވަޅުތަކަށް ތައުރީފް ކުރައްވައި ޝިޔާމް ވިދާޅުވީ ރާއްޖެ ވައްޓާލާފައިވާ ފުން އިގްތިސާދީ އަނދަވަޅުން ސަލާމަތްކޮށް ދިވެހީންގެ މުސްތަގުބަލަށްޓަކައި ނިންމަވާ ނިންމެވުންތަކަކީ ސިޔާސީ ލީޑަރުން ފަސްޖެހޭ ނިންމެވުންތަކެއް ކަމަށެވެ.
ދިވެހިރާއްޖެ ވައްޓާލާފައިވާ ފުންއިޤްތިޞާދީ އަދަވަޅުން ސަލާމަތްކޮށް ދިވެހީންގެ މުސްތަޤުބަލަށްޓަކައި ރައީސް ތިޔަނިންމަވާ ނިންމެވުންތަކަކީ ސިޔާސީ ލީޑަރުން ފަސްޖެހޭ ނިންމެވުންތަކެއް. ސިޔާސީ ވިސްނުންފުޅަށްވުރެ ޤައުމީވިސްނުންފުޅު އިސްކުރައްވާކަމީ ރައްޔިތުންނަށް އޮތް އެންމެބޮޑު އުންމީދު https://t.co/AajCzyydVn
— Ahmed Shiyam (@Shiyamaldives) June 27, 2024
"ސިޔާސީ ވިސްނުންފުޅަށްވުރެ ގައުމީ ވިސްނުންފުޅު އިސްކުރައްވާކަމީ ރައްޔިތުންނަށް އޮތް އެންމެ ބޮޑު އުންމީދު،" ޝިޔާމް ވިދާޅުވިއެވެ.
ރާއްޖޭގެ އިގްތިސާދީ ހާލަތު ވަރަށް ބޮޑަށް ގޯސްވެފައިވާ އިރު، މި ހާލަތުން އަރައިގަތުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ސިޔާސީ މަގާމުތައް މަދު ކުރުމާއި ސަރުކާރުގެ ކުންފުނިތައް ރިފޯމް ކުރުމާއި ރިކަރަންޓު ހަރަދު ކުޑަ ކުރުން ފަދަ ކަންކަން ހިމެނެއެވެ.
ރައީސް ޑރ. މުހައްމަދު މުއިއްޒު ވަނީ ހަރަދުތައް ކުޑަކުރުމުގެ ގޮތުން މިނިވަން ދުވަހުގެ ހަރަކާތްތައް ނުބޭއްވުމަށް އަންގަވައިފައެވެ. އަދި މިނިވަން ދުވަސް ފާހަގަ ކުރުމަށް ހަމައެކަނި ޖަލްސާއެއް ބޭއްވުމަށް ވެސް އެމަނިކުފާނު ވަނީ އަންގަވައިފައެވެ.
ސަރުކާރުގެ ހަރަދުތައް ކުޑަކޮށް އަދި އާމްދަނީ އިތުރުކުރުމުގެ ފިޔަވަޅުތައް ކުރިއަށް އޮތް ދުވަސްތަކުގައި އަޅަން ފިނޭންސް މިނިސްޓްރީން ނިންމިއިރު، އަޅާނެ ފިޔަވަޅުތައް ވެސް މިނިސްޓްރީން ވަނީ އިއުލާންކޮށްފައެވެ.
