ދުނިޔޭގެ އިގްތިސާދުތަކުގެ ކުރެޑިޓް ރޭޓިން ކަނޑައަޅާ، އަދި ބައިނަލް އަގުވާމީ ފައިނޭންޝަލް މާރކެޓްތަކު ރިސާރޗް އެނަލިސިސް ހެދުމަށް މަޝްހުރު ކުންފުންޏެއް ކަމުގައިވާ ފިޗުން ރާއްޖޭގެ ރޭޓިން ދަށް ކޮށްފިއެވެ.
އެގޮތުން ފިޗުންވަނީ މީގެ ކުރިން ރާއްޖެއަށް ދީފައިވާ "ބީ މައިނަސް"ގެ ރޭޓިން "ސީސީސީ ޕްލަސް"އަށް ދަށްކޮށްފައެވެ.
މިއީ ފާއިތުވި 3 އަހަރު ރާއްޖޭގެ ރޭޓިން އެއްވަރެއްގައި ހިފެހެއްޓުމަށްފަހު ރާއްޖޭގެ ރޭޓިން ދަށްވި ފުރަތަމަ ފަހަރެވެ.
ފިޒުން ރާއްޖޭގެ ރޭޓިން ދަށްކޮށްފައިވަނީ ރާއްޖޭގެ އިގްތިސާދީ ހާލަތާއި ގުޅޭގޮތުން ގިނަބައެއްގެ ކަންބޮޑުވުން އުފެދިފައިވާ ދަނޑިވަޅެއްގައިކަން ފާހަގަ ކޮށްލެވެއެވެ. އަދި ކަޅު ބާޒާރުގައި ޑޮލަރުގެ އަގު އިންތިހާއަށް މަތިވެސް، ޑޮލަރުގެ ތާށީކަންވެސް އިންތިހާއަށް ބޮޑުވެފައިވާ ދަނޑިވަޅެއްގައެވެ.
ރާއްޖޭގެ އިގްތިސާދީ ހާލަތާއި ގުޅޭގޮތުން ފިޗުން އާންމުކޮށްފައިވާ ރިސާޗް އެނަލިސިސްއަށް ބަލާއިރު އެންމެ ބޮޑަށް ފާހަގަ ކޮށްލެވެނީ، ދަރަނި ދެއްކުމުގައި ދައުލަތަށް ބޮޑެތި ގޮންޖެހުންތަކާއި ކުރިމަތިލާން ޖެހިދާނެކަމަށް ފާހަގަ ކޮށްފައި ވުމެވެ. އެގޮތުން ފިޗުން ފާހަގަ ކޮށްފައިވާ ގޮތުގައި އަންނަ އަހަރު ދަރަނީގެ ގޮތުގައި 9 ބިލިއަން އަދި 2026 ވަނަ އަހަރު ދަރަނީގެ ގޮތުގައި 15 ބިލިއަން ރުފިޔާ ދައްކަންޖެހިފައިވާކަންވެސް ފާހަގަ ކޮށްފައި ވެއެވެ.
ހަމަ އެއާއެކު، ފޮރިން ރިޒާވުގެ ޝޯޓް ޓާމު ފޮރިން ލައިބިލިޓީތަކުގެ އަދަދު 73 މިލިއަން ޑޮލަރު ނުވަތަ 1.1 ބިލިއަން ރުފިޔާއަށް ދަށްވެގެން ގޮސްފައިވާ ކަމަަށްވެސް ފާހަގަކޮށްފައިވާއިރު، ރާއްޖޭގެ ކަރަންޓު އެކައުންޓުގެ ޑެފިޒިޓް 492 މިލިއަން ޑޮލަރުން 748 މިލިއަން ޑޮލަރަށް އިތުވެފައިވާކަމަށްވެސް ފިޒްގެ ބަޔާނުގައި ބުނެފައި ވެއެވެ. ދިވެހި ރުފިޔާއިން ބަލާނަމަ ކަރަންޓް އެކައުންޓް ޑެފިސިޓް 7.5 ބިލިއަން އިން 12 ބިލިއަންއަށް ވަނީ އިތުރުވެގެން ގޮސްފައެވެ.
ފިޗުން ވަނީ، ދަރަނި ދެއްކުމަށް އުފައްދާފައިވާ ސޮވެރިންގ ޑިވެލޮޕްމަންޓް ފަނޑު (އެސްޑީއެފް)ގައި ބޭނުން ކުރެވޭގޮތަށް ހުދި ފައިސާ އަދަދު މަދުވުމުން އެކަންވެސް ފާހަގަ ކޮށްފައެވެ. އެގޮތު އެސްޑީއެފްގައި 8 ބިލިއަން ރުފިޔާ ޖަމާވެފައި ހުރި ނަމަވެސް، ބޭނުން ކުރެވޭގޮތަށް ހުރީ އެންމެ 832 މިއަން ރުފިޔާ (54 މިލިއަން ޑޮލަރު)ކަން ފިޗުން ފާހަގަ ކޮށްފައި ވެއެވެ.
އަދި ޚަރަދު ކުޑަކުރުމުގެ ގޮތުން އެކަށީގެންވާ ފިޔަވަޅުތަކެއް އެޅެމުން ނުދާކަންވެސް ފާހަގަ ކޮށްފައި ވެއެވެ.
ރާއްޖޭގެ މާލީ ހާލަތު ވަޒަންކުރުމުގައި ބޭރުގެ ޖަމިއްޔާ ޖަމާއަަތްތަކުން ފިޗްގެ ރޭޓިންއަށް ވަރަށް ބޮޑަށް ބަރޯސާ ވާނެއެވެ. އެގޮތުން ފި×ްގެ ރޭޓިން ދަށްވެގެން ދިއުމަކީ މާލީ އެހީތެރިކަމާއި އަދި ލޯންތައް ހޯދުމުގައިވެސް ރާއްޖެއަށް މުސްތަގުބަލުގައި ކުރިމަތިވެގެންދާ ގޮންޖެހުމަކަށް ވެގެން ދާނެއެވެ.
