ކޮންމެހެން މަޖުބުރު ހާލަތެއްގައި މެނުވީ، ޔޫރަޕްގެ 27 ގައުމުންވެސް، އިގިރޭސިވިލާތައް މިވަގުތު ދަތުރުކުރުން މަޑު ޖައްސާލުމަށް، މެމްބަރު ހުރިހާ ގައުމަކަށް ޔޫރަޕިއަން ޔޫނިއަންއިން ގޮވާލައިފިއެވެ.

ޔޫރަޕިއަން ޔޫނިއަންއިން މިގޮތަށް އިލްތިމާސްކޮށްފައިވަނީ، ކޯވިޑް19ގެ އަސްލު ވައިރަހަށްވުރެ ފަސޭހައިން ގައިންގަޔަށް ފެރުތޭ، ކޯވިޑް19 ބަލި ޖައްސާ ކޮރޯނާއި ވައިރަހުގެ މުޅިން އާ ސްޓްރެއިން (ކޮރޯނާ ވައިރަސް މިއުޓޭޓްވެގެން އުފެދޭ ވައިރަހުގެ ތަފާތު ނަކަލެއް)އެއް އެގައުމުގައި ހަލުއިކަމާއެކު ފެތުރެން ފެށުމާއި ގުޅިގެންނެވެ.

އިގިރޭސިވިލާތުގައި ކޯވިޑް19ގެ މި ސްޓްރެއިން ފެތުރެން ފެށުމާ ގުޅިގެން، ޔޫރަޕްގެ އެކި ގައުމުތަކުން އެކި މިންވަރަށް ވަނީ، އެގައުމުތަކުން ޔޫކޭއަށް ދަތުރުކުރުން ހުއްޓުވާފައެވެ. އެހެންނަމަވެސް، ޔޫރަޕިއަން ޔޫނިއަންއިން، ބުނެފައިވަނީ، ޔޫރަޕްގެ 27 ގައުމު ގުޅިގެން، އިގިރޭސި ވިލާތަށް ދަތުރުކުރުން ހުއްޓާލުމަށް ފިޔަވަޅުތަކެއް އެޅުން މުހިންމު ކަމުގައެވެ.

އެހެންނަމަވެސް، މި ފަިޔަވަޅުތަކުގެ ނަތީޖާއެއްގެ ގޮތުން، މިހާރު އިގިރޭސިވިލާތުގައި ނުވަތަ ޔޫރަޕްގެ އެހެން ގައުމެއްގައި ތިބި ގައުމުތަކަށް ނިސްބަތްވާ ރައްޔިތުން އެބުރި އެގައުމުތަކަށް ދިއުން ނުހުއްޓުވުމަށްވެސް އީޔޫއިން އިލްތިމާސް ކޮށްފައި ވެއެވެ.

އީޔޫގެ ޖަސްޓިސް ކޮމިޝަނަރ ޑީޑިއަރ ރޭއިންޑަރސް ވިދާޅުވެފައިވަނީ، "މެމްބަރު ގައުމުތަކުން، ކޮންމެހެން މަޖުބޫރީ ހާލަތެއްގައި މެނުވީ، އިގިރޭސިވިލާތާއި ދެމެދު ދަތުރުފަތުރު ނުކުރުމަކީ އެންމެ އެދެވިގެންވާ ގޮތް. އެހެންނަމަވެސް، އިގިރޭސިވިލާތުގައާއި އަދި އެނޫން މެމްބަރު ގައުމުތަކުގައިވެސް މިހާރު ތިބި އެގައުމުތަކަށް ނިސްބަތްވާ ރައްޔިތުންނަށްވެސް އެބުރި ގައުމަށް ނާދެވޭ ގޮތަށް ބޯޑަރުތައް ބަންދުކުރުމަކީ އެންމެ ރަގަޅު ގޮތް ނޫން،" ކަމުގައެވެ.

މި ހަފްތާގެ ހޯމަ ދުވަހުން ފެށިގެން އިގިރޭސިވިލާތުގައި ވަނީ ކޯވިޑް19 ބަލި ޖައްސާ ކޮރޯނާ ވައިރަހުގެ މުޅިން އާ ސްޓްރެއިންއެއް ފެތުރެން ފަށާފައެވެ.

ވައިރަހުގެ އާ ސްޓްރެއިންއަކީ، އަސްލު ވައިރަސް، އެއްފަހަރަށް ނުވަތަ އެއަށްވުރެ ގިނަ ފަހަރަށް މިއުޓޭޓް ވެގެން ގޮސް، ވައިރަހުގެ އަސްލު ޑީއެންއޭ އެތުރިފައި އިންނަ ގޮތަށް ބަދަލު އައިސް، ނަތީޖާއެއްގެ ގޮތުން ވައިރަސް ފެތުރޭ ގޮތަށްވެސް ބަދަލުތަކެއް އައިސް، އަސްލު ވައިރަހުން ނަކަލުވެގެންދާ، ވައިރަހުގެ އާވައްތަރަކަށް ކިޔާ ނަމެކެވެ. ވައިރަސް މިއުޓޭޓް ވުމަކީ ވައިރަހުގެ ޑީއެންއޭ އެތުރިފައި އިންނަ ތަރުތީތަބަށް ބަދަލު އައުމެވެ.

އިގިރޭސިވިލާތުގެ ހެލްތު ސެކެޓްރީ މެޓް ހެންކޮކް ވިދާޅުވެފައިވަނީ، ކޯވިޑް19 ޖައްސާ އިތުރު ސްޓްރެއިންގެ މިވައިރަސް ފެތުރެމުންދާ ކަމަށް މިހާތަނަށް ފާހަގަ ކުރެވިފައިވަނީ، އެގައުމުގެ އިރު ދެކުނު ސަރަހައްދުގައެވެ. އަދި މިހާތަނަށް ފާހަގަ ކުރެވިފައިވާ ގޮތުގައި މި ސްޓްރެއިންގެ ކޮރޯނާ ވައިރަސް، އެންމެ ފުރަތަމަ ފެނުނު ނަކަލަށްވުރެ މާބާރަށް ފެތުރެމުން ދެއެވެ. އެހެން ނަމަވެސް، މި ނަކަލުން ޖައްސާ ބަލީގެ އަލާމާތްތައް މިހާތަނަށް ފެތުރެމުންދިޔަ ބައްޔަށް ވުރެ ބާރުދައްކަމަށް ފާޙަގަ ކުރެވިފައި ވެއެވެ.

ހެލްތު ސެކެޓްރީ ހެންކޮކް ވިދާޅުވެފައިވާ ގޮތުގައި، އިގިރޭސިވިލާގެ ދެކުނުގެ ސަރަހައްދުތަކުން މިހާތަނަށް އައިއިރު، މި ސްޓްރެއިންގެ 1000 ކޭސް ވަނީ ފާހަގަކުރެވިފައެވެ. އަދި ވިދާޅުވީ، މުޅިން އަލަށް ފާހަގަ ކުރެވިގެން ދިޔަ، ކޮރޯނާ ވައިރަހުގެ މި ނަކަލާއި ގުޅޭ މައުލޫމާތު މިހާރުވަނީ ދުނިޔޭގެ ސިއްޙަތު ޖަމްއިއްޔާއާއި ހިއްސާ ކުރެވިފައެވެ. އަދި އެގައުމުގެ ސިއްޙީ އިދާރާތަކުން ދަނީ، ހާލަތު ވަރަށް ގާތުން ވަޒަންކޮށް ދިރާސާ ކުރަމުންނެވެ.