ދިވެހިރާއްޖޭގެ މިނިސްޓަރ އޮފް ފޮރިން އެފެއާޒް، މޫސާ ޒަމީރު، އެމެރިކާގެ ސެކްރެޓަރީ އޮފް ސްޓޭޓް އެންޓޯނީ ބްލިންކެންއާ، މިއަދު ބައްދަލުކުރައްވައިފިއެވެ.
މިނިސްޓަރު ޒަމީރާއި ސެކްރެޓަރީ ބްލިންކެންގެ މަޝްވަރާތައް އަމާޒު ކޮށްފައި ވަނީ ދިވެހިރާއްޖެ އާއި އެމެރިކާގެ ގުޅުން ބަދަހި ކުރުމާއި ގުޅޭ ގޮތުންނާއި، ދިފާއީ އަދި ސަލާމަތީ އެއްބާރުލުމުގެ ދާއިރާއިން ހިމެނޭ ގޮތަށް، ޑިމޮކްރަސީ ކުރިއެރުވުމާއި ހަރުދަނާކުރުމާއި، އިގްތިސާދީ ކުރިއެރުމަށް އެއްބަސް ވުމާއި، އަދި މޫސުމަށް އަންނަ ބަދަލުތަކާއި ގުޅޭ ގޮތުންނެވެ.
ދިވެހިރާއްޖެއާއި އެމެރިކާއިން ދެގައުމުގެ ގުޅުން އިތުރަށް ހަރުދަނާ ކުރުމަށް އާ މަގުތައް ހޯދުމަށް އެއްބަސްވެ، ބައިނަލްއަގުވާމީ އުސޫލުތައް ހިފެހެއްޓުމުގެ މުހިންމުކަމުގެ މައްޗަށް އެއްބަސްވިއެވެ، އަދި ސަރަހައްދީ ހަމަޖެހުމާއި ކަނޑުގެ ސަލާމަތާއި ސުލްހަ ކުރިއެރުވުމުހެ މައްޗަށްވެސް ދެގައުމުން އަލިއަޅުވާލާފައި ވެއެވެ.
ސެކްރެޓަރީ ބްލިންކެން ވަނީ ރިޔާސީ އިންތިޚާބާއި ރައްޔިތުންގެ މަޖިލީހުގެ ކާމިޔާބީއަށް ދިވެހިރާއްޖެއަށް މަރުހަބާ ވިދާޅުވެ، މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރުމާއި ތިމާވެށީގެ ދެމެހެއްޓެނިވިކަން ކުރިއެރުވުމަށް ބައިނަލްއަޤްވާމީ ފޯރަމްތަކުގައި ދިވެހިރާއްޖެގެ ލީޑަޝިޕަށް އިޙްތިރާމް ކުރައްވާކަމަށް ވިދާޅުވެފައެވެ.
މި ބައްދަލުވުމުގައި މިނިސްޓަރު ޒަމީރު ވަނީ އެމެރިކާއިން ފޯރުކޮށްދޭ ތައުލީމީ ފުރުސަތުތަކުގެ މުހިންމުކަން ގަބޫލުކުރައްވައި، ދިވެހިންނަށް ވިސާ ލިބުން ފަސޭހަކޮށްދިނުމުން މީހުންނާއި މީހުންނާ ގުޅުން ބަދަހިވެ، ސަގާފަތާއި، ފަތުރުވެރިކަމާއި، ވިޔަފާރީގެ ގުޅުންތައް ކުރިއެރުވުމަށް މަގުފަހިވާނެކަން ފާހަގަކުރައްވާފައެވެ.
މިނިސްޓަރު ޒަމީރުގެ އަރިހުގައި އެމެރިކާގައި ހުންނަވާމި ބައްދަލު ކުރެއްވުމުގައި، ދިވެހިރާއްޖޭގެ ސަފީރު އަބްދުލްޣަފޫރު މުހައްމަދުއާއި ސެކްރެޓަރީ، ބައިލެޓަރަލް ޑރ ހާލާ ހަމީދުއާއި ސީނިއާ އަންޑަސެކްރެޓަރީ، ހަސަން ހުސައިން ޝިހާބުއާއި، ކައުންސެލަރު، ޒީނާ ދީދީ އަދި ސެކަންޑް ސެކްރެޓަރީ އިބްރާހިމް ހައިލް ވެސް ބައިވެރިވެވަޑައިގެންނެވި އެވެ.
