ދިވެހި ހައްޖާޖީން މިއަދު ރާއްޖެ އަނާތީ އެއަރޕޯޓުގެ ޓްރެފިކަށް ބާރުބޮޑުވާނެތޯ ފުރާމީހުން 3 ގަޑިއިރު ކުރިޔަށް އޮއްވާ އެއަރޕޯޓަށް ދިއުމަށް އެމްއޭސީއެލްއިން އިލްތިމާސް ކޮށްފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އިން މިއަދު "އެކްސް" ގައި ކުރި ޕޯސްޓެއްގައި ބުނީ ޙައްޖުގެ މަތިވެރި އަޅުކަން އަދާކުރުމަށްފަހު ޙައްޖާޖީން މިއަދު މާލެ އަންނަ ގަޑީގައި، ވެލާނާ އިންޓަރނޭޝަނަލް އެއަރޕޯޓްގެ ތޮއްޖެހުން ބޮޑުވާނެތީ، އެއަރޕޯޓަށް ފުރަންދާ މީހުން ގަޑިއަށް ސަމާލުވުމަށް އެދޭ ކަމަށެެވެ.
ދިވެހި ހައްޖުވެރިންގެ ފުރަތަމަ ގްރޫޕް މިހާރުވަނީ ރާއްޖެ އައުމަށް ފުރާފައެވެ. ހައްޖުވެރިންގެ ފުރަތަމަ ގްރޫޕް މާލެ އައުމަށް ޖިއްދާއިން ފުރީ ރާޢްޖެ ގަޑިން މިއަދު ހެނދުނު 7:50 ގައެވެ.
މި ފްލައިޓް ވެލާނާ އިންޓަރނޭޝަނަލް އެއަރޕޯޓުގައި ޖައްސާނެކަމަށް ލަފާކުރެވެނީ މިއަދު މެންދުރު 1:55 ގައެވެ.
ދެވަނަ ގްރޫޕު މިމަމަހުގެ 28 ވަނަ ދުވަހު އައުމަށް ހަމަޖެހިފައިވާއިރު ތިން ވަނަ ގްރޫޕު ޖުލައި މަހުގެ 1 ވަނަ ދުވަހު އަދި ހަތަރު ވަނަ ގްރޫޕު ޖުލައި މަހުގެ 4 ވަނަ ދުވަހު އައުމަށް ހަމަޖެހިފައިވާ ކަމަށް އިސްލާމީ ކަންތައްތަކާބެހޭ ވުޒާރާއިން ބުނެއެވެ.
ރާއްޖެއިން މިއަހަރުގެ ހައްޖުގެ އަޅުކަމަށް 1150 ހައްޖުވެރިން ވަނީ ގޮސްފައި އެވެ. އަދި އަމީރުލްހައްޖުގެ ގޮތުގައި މިއަހަރު ރާއްޖޭގެ ފަރާތުން ވަޑައިގެންނެވީ ތައުލީމާއި ބެހޭ ވަޒީރެވެ.
