މާލެ ސަރަހައްދުގައި ކުށް ކުރުން އިތުރުވެފައި ވަނީ އެއްވެސް އުސޫލެއް ނެތި ކުރީގެ ސަރުކާރުން ގިނަ އަދަދެއްގެ ކުށްވެރިން ދޫކޮށްލާފައިވާތީ ކަމަށް ފުލުހުން ތަރުޖަމާން އަދި އެސިސްޓެންޓް ކޮމިޝަނާ އޮފް ފޮލިސް އަހްމަދު ޝިފާން މިއަދު ވިދާޅުވެއްޖެއެވެ.
ޝިފާން "އެކްސް" ގައި ކުރެއްވި ޕޯސްޓެއްގައި ވިދާޅުވީ މާލޭގައި ކުށްކުރުން އިތުރުވެފައިވާ ވާހަކައަކީ ހަގީގަތެއް ކަމަށެވެ. އެގޮތުން، ކުށްކުރުން އިތުރުވި މައިގަނޑު އެއް ސަބަބަކީ މީގެ 10 މަސްދުވަސް ކުރިން 434 ކުށްވެރިން މުޖުތަމައު އަށް ދޫކޮށްލުމުން ކަމަށް ޝިފާން ވިދާޅުވިއެވެ.
ޝިފާން ވިދާޅުވިގޮތުގައި އެ ކުށްވެރިން ދޫކޮށްލީ އެ މީހުންގެ ކަންކަން ބެލެހެއްޓޭނެ ހަރުދަނާ ނިޒާމެއްނެތި ކަމަަށެވެ. އަދި ފުލުހުންގެ އިންފްރާސްޓްރަކްޗަރ ތަރައްޤީކުރުމަށް ކުރިން ރޭވުންތެރިކަމާއެކު މަސައްކަތްތައް ކުރެވިފައި ނެތުމުގެ ސަބަބުން މި މައްސަލަ ހައްލުކުރުމަށް ވަރަށް ބޮޑަށް ދަތިވެފައިވާ ކަމަށް އޭނާ ވިދާޅުވިއެވެ.
މިދިއަ ރިޔާސީ އިންތިހާބާ ދިމާކޮށް އޭރުގެ ރައީސް އިބްރާހިމް މުހައްމަދު ސޯލިހު ވަނީ ގިނަ އަދަދެއްގެ ކުށްވެރިންނަށް މާފު ދެއްވައިފައެވެ. އޭގެ ތެރޭގައި ބޮޑެތި ކުށްތަކަށް އަރައިގެންފައިވާ މީހުން ވެސް ހިމެނެއެވެ.
އޭގެ ފަހުން މާލޭގައި ވައްކަމާއި މާރާމާރީ އާއި ފޭރުމުގެ މައްސަލަތައް ވަރަށް ބޮޑަށް އިތުރުވެފައިވެއެވެ.
