ކުޅުދުއްފުށި ހިމެނިގެން ދަނީ ކޮންމެ އަހަރަކުވެސް ތަފާތު ގޮތަކަށް، އެހާމެ ކުލަގަދަކޮށް އީދުކުޅިވަރުތައް ގެނެސްދޭ ރަށަކަށެވެ. އެގޮތުން މިއަހަރުގެ އީދު ކުޅިވަރުތަކަށްވެސް އެރަށު ކައުންސިލުންވަނީ ބޮޑެތި ތައްޔާރީތަކެއްވެފައެވެ. އަދި މިއަހަރުގެ އީދު ކުޅިވަރުތައް ސަންގު ޓީވީން ލައިވް ކުރާގޮތަށް ހަމަޖައްސާ، މިއަހަރުގެ އީދު ކުޅިވަރުތައް މިއަހަރުވަނީ އިތުރަށް ފުޅާ ކޮށްފައެވެ.
އެގޮތުން މިއަހަރުގެ އަޟުހާ އީދު ފާހަގަކުރުމަށް ކުޅުދުއްފުށީގައި ކުރިޔަށް ގެންދިޔަ ސަގާފީ ގިނަ ކުޅިވަރުތަކުގެ ތެރެއިންވެސް އެންމެ ގިނަ ބައެއްގެ ސަމާލުކަން ހުއްޓިގެން ދިޔައީ، އެރަށުގައި ކުރިޔަށްދިޔަ މަށިމާލި ޕެރޭޑަށެވެ. އެ ޕެރޭޑަކީ މުޖުތަމައުގެ އެކި މައްސަލަތަކަށް ޚާއްސަކޮށްގެން ގެނެސްދޭ ޕެރޭޑެކެވެ.
މި ޕެރޭޑުގައި އާންމު ގޮތެއްގައި ގެނެސްދެނީ، ގައުމުގައި އެދުވަސްވަރެއްގައި ހިނގާ ސިޔާސީ މައްސަލަތަކާއި ގުޅޭ ކެރެކްޓަރތަކާއި މެސެޖްތަކެވެ. އެގޮތުން މިއަހަރުގެ ޕެރޭޑްގައިވަނީ، ކުޅުދުއްފުށީގެ އިތުރުން ބައެއް ރަށްތަކަށް ކުރިމަތިވަމުންދާ ކަރަންޓުގެ މައްސަލަތައްވެސް ތަމްސީލު ކޮށްދީފައެވެ.
އަދި އޭޣެ އިތުން ވަކީން ޚާއްސަކޮށް އޭރަކު އޮންނަ ސަރުކާރަކުން ކުޅުދުއްފުށި ސީޓީއަށް ވާ ވައުދުތަކުގެ މައްޗަށް އެކި ކެރެކްޓަރތަކާއި މޮޑެލްތައް ހަދާ، ނުފުއްދި ހުންނަ ވައުދުތަކުގެ ސަރުކާރު ހަނދާން ކޮށްދިނުން އޮވެއެވެ.
އެހެން އަހަރުތަކެކޭ އެއްފަދައިން މިއަހަރުވެސް ސޯޝަލް މީޑިއާގައި ވަނީ މަށިމާލި ޕެރޭޑްގެ އެކި ފޮޓޯތައް ގިނަ އަދަދަކަށް ދައުރު ކޮށްފައެވެ.
ކުޅުދުއްފުށިގައި މިއަހަރުގެ އަޟުހާ އީދުގައި އޮތް ކުޅިވަރުތަކުގެ ތެރޭގައި ހޮނިހިރު ދުވަހު ރޭ ވަނީ "ކުރުނބާ ޢީދު" ހަރަކާތް ކުރިއަށް ގެންގޮސްފައެވެ. އަދި ހަމައެރޭ އީދު މާލި (ދައްސޫރަ) ކުޅިވަރު ވެސް ވަނީ ކުރިއަށް ގެންގޮސްފައެވެ.
އީދު ދުވަހު ހެނދުނު ރަށްމަތިފަންނުގައި ވަނީ ސަގާފީ ކުޅިވަރެއް ކަމުގައިވާ އޮނުބަޑިޖެހުން އޮތެވެ. އަދި އެ ދުވަހު ހަވީރު ވަނީ ބަންދު ދުވުމާއި، ރާނީ ހިނގުން ބާއްވާފައެވެ.
އީދުގެ މުނާސަބާ ފާހަގަ ކުރުމުގެ ގޮތުން ކުޅުދުއްފުށީގައިވަނީ ހަވާވެސް ހަރުވާފައެވެ. އަދި ދަފި ނެގުމުގެ ހަރަކާތްތަކާއި، އެންމެ މޮޅު އީދުގެ ހޮވުން އޮތެވެ.
އަދި އޭގެ އިތުރުން އަންހެނުން ކުރުފަލިޖެހުމާއި، އަންހެނުންގެ ކޯޑި، ބޮޑުފައިވާން ހިނގުމާއި، ފޮޓާ އުފާ ނަމުގައި ވެލިގަނޑު ސްޓޭޖް ސަރަހައްދުގައި ޝޯވތައް ބޭއްވުންފަދަ ގިނަ ހަރަކާތްތަކެއް ވަނީ ކުރިއަށް ގެންގޮސްފައެވެ.
