އުފާ ފާޅުކުރުމުގައި އެހެން ދީންތަކުގެ އަހުލުވެރީންގެ ގޮތްތައް ކޮޕީކުރުން ދޫކޮށްލާން ޖެހޭ ކަމުގައި މިއަދު އީދު ޚުޡުބާގައި ވިދާޅުވެއްޖެއެވެ.
މިއަދު ޚުޡުބާގައި ވިދާޅުވީ މާތް ނަބިއްޔާގެ އިރުޝާދުގައި ވާގޮތުން މުސްލިމުން އުފާ ފާޅުކުރާއިރު އިސްލާމް ދީނުގެ އުސޫލުތަކަށް ތަބާވާން ޖެހޭނެއެވެ. އަދި ދީނުގައި ހަރާމް ކުރައްވާފައިވާ ކަންކަން ކުރުމާއި، އުފާ ފާޅުކުރުމުގައި އެހެން ދީންތަކުގެ އަހުލުވެރީންގެ ގޮތްތައް ކޮޕީކުރުން ދޫކޮށްލާން ޖެހެއެވެ.
އަހަރެމެންނަކީ މާތްﷲ އިސްލާމްދީނުގެ ސަބަބުން އިއްޒަތްތެރިކަން ދެއްވާފައިވާ ބައެއްކެވެ. ﷲ ރުއްސުންލެއްވި އުމަރުގެފާނު ވިދާޅުވެފައި ވެއެވެ. "ފަހެ ހަމަކަށަވަރުން އަހަރެމެންވީ އެންމެ ދެރަ ނިކަމެތީންގެ ގޮތުގައެވެ. ދެންފަހެ މާތް ﷲ އަހަރެންނަށް އިސްލާމްދީނުގެ ސަބަބުން ޢިއްޒަތް ދެއްވިއެވެ. ފަގެ މާތް ﷲ އަހަރެމެންނަށް ޢިއްޒަތްތެރިކަން ދެއްވި ކަންތައް ފިޔަވައި އެހެން ކަމަކުން އަހަރެމެން އިއްޒަތް ހޯދާން އުޅެފިނަމަ، މާތްﷲ އަހަރެމެން ނިކަމެތި ކުރައްވާނެކަން ދަންނާށެވެ."
މިއަދު ޢީދު ޚުޡުބާގައި ވިދާޅުވެފައި ވެއެވެ.
މިއަދުގެ ޚުޡުބާގައި ވިދާޅުވީ އިސްލާމް ދީނަމީ ޢިއްޒަތްތެރިކަން ލިބިގެންވާ ދީނެއް ނަމަވެސް، މިއަދު މުސްލިމުން ވަނީ ވަރަށް ނިކަމެތި ވެފައި ކަމުގައެވެ. އެގޮތުން މިކަން އެންމެ ބޮޑަށް ދޭހަކޮށްދޭ އެއްކަމަކީ، ފަލަސްތީނުގެ ރަފަހާއި، ޢައްޒާއާއި، އެހެނިހެން ބިންތަކަށް ސަޙުޔޫނީން ވެރިވެގަނެފައި ވީހިނދުވެސް، މި ބޮޑު އުންމަތް، އެ ލޮބުވެތި އަޚުންނާއި އުޚުތުން ހިމާޔަތް ކުރުމަށް ނުކުޅެދިފައި ވުމުން ކަމުގައިވެސް ޚުޡުބާގައި ވިދާޅުވެފައި ވެއެވެ.
މި އުއްމަތުގެ މީސްތަކުންގެ އަދަދާއި ގުދުރަތީ ވަސީލަތްތައް ގިނަވެފައިވީ ނަމަވެސްމެއެވެ. އެހެންކަމުން މި މަތިވެރި ދުވަހުގައި، އުންމަތް ބިނާކުރުމަށް އަހަރެމެން އަޒުމް ކަނޑައަޅަމާ ހިނގާށެވެ! އިލްމާއި ތައުލީމު ކުރިއެރުވުމުގައި، ކުރިޔަށް ދިއުމަށް މަސައްކަތް ކުރަމާ ހިނގާށެވެ! ފަންނިއްޔަތާއި ފަންނުވެރިކަމުގައި ހުނަރުވެރިވަމާ ހިނގާށެވެ. ﷲއާއި ރަސޫލާގެ އަދުއްވުން، އިސްލާމްދީނާއި ދެކޮޅަށް ރާވާ މަކަރުވެރި ރޭވުންތަކާއި ދެކޮޅަށް، އެއްބައިވަންތަކަމާއެކު، ކުރިމަތިލަމާ ހިނގާށެވެ!
މިއަދުގެ ޚުޡުބާގައި ވިދާޅުވެފައި ވެއެވެ.
