ހޯމްލޭންޑް އެންޑް ސެކިއުރިޓީ މިނިސްޓްރީން މުޅި ރާއްޖޭގައި ކުރިއަށް ގެންދާ އޮޕަރޭޝަން "ކުރަނގި" ކ. މާފުށީގައި މިއަދު ފަށައިފިއެވެ.
"ކުރަނގި" އޮޕަރޭޝަން މިދިޔަ މަހު ފަށާފައި ވަނީ ކ. ހިންމަފުށިންނެވެ. އެކިއެކި މަރުހަލާތަކަށް ބަހާލައިގެން ކުރިއަށް ގެންދާ މި އޮޕަރޭޝަންގައި ރާއްޖޭގެ މީހުން ދިރިއުޅޭ ހުރިހާ ރަށެއް ކަވަރުކޮށް، ބިދޭސީންނާ ގުޅޭ ހުރިހާ މައުލޫމާތަކާއި ފިންގާ ޕްރިންޓު އެއް ކުރުމަށް ހަމަޖެހިފައިވެއެވެ.
ފުރަތަމަ މަރުހަލާގައި ރާއްޖޭގައި ތިބި ހުރިހާ ބިދޭސީންގެ މައުލޫމާތު އެއް ކުރުމަށް ހޯމް މިނިސްޓްރީން ވަނީ ނިންމައިފައެވެ.
ހޯމް މިނިސްޓްރީން އެންމެ ފަހުން އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި މި އޮޕަރޭޝަނުގެ ތެރެއިން މިހާތަނަށް 705 ބިދޭސީންގެ މައުލޫމާތު ވަނީ އެއްކޮށްފައެވެ. އޭގެ ތެރޭގައި ހިންމަފުށީގައި އުޅޭ 532 ބިދޭސީން ހިމެނެއެވެ.
ހޯމްލޭންޑް ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން މީގެ ކުރިން ވިދާޅުވެފައި ވަނީ ކުރިއަށް އޮތް ތިން އަހަރު ދުވަހުގެ ތެރޭގައި ގަވައިދާ ހިލާފަށް އުޅޭ ބިދޭސީންގެ މައްސަލައަށް ހައްލު ލިބިގެންދާނެ ކަމަށެވެ. ފުރަތަމަ މަސައްކަތެއްގެ ގޮތުން ރާއްޖޭގައި އުޅޭ ހުރިހާ ބިދޭސީންގެ ފިންގާ ޕްރިންޓާއި ފޮޓޯ އަދި މައުލޫމާތު އެއް އަހަރު ދުވަހުގެ ތެރޭގައި އެއްކުރެވިގެންދާނެ ކަމަށް ވެސް އިހުސާން ވިދާޅުވިއެވެ.
އަދި ފަހު ދެ އަހަރު މަަސައްކަތް ކުރާނީ ކަށަވަރުނުވާ، ރަސްމީ ލިޔެކިޔުންތައް ނެތް، ސިސްޓަމް ތެރެއަށް ނުގެނެވޭނެ މީހުން ރާއްޖެއިން ބޭރުކޮށްލުމަށެވެ. އިހުސާން ވިދާޅުވީ، ކައުންސިލްތަކުން އެ ރަށެއްގައި ދިރިއުޅޭ ބިދޭސީންގެ ދަފްތަރު ބެލެހެއްޓުމަށް ދިމާވާ ދަތިތަކަށް ހައްލު ހޯދައިދިނުމަށް ހޯމް މިނިސްޓްރީގެ މެއިން ޑާޓާބޭސްއަށް ކައުންސިލްތަކުގެ އެކްސެސް ދޭނެ ކަމަށެވެ.
