ރާއްޖޭގެ ބޮޑުކަންނެލި މަސްވެރިންގެ ހުރި ކަންބޮޑުވުންތަކުގެ އަޑު ސަރުކާރަށް އިއްވުމަށް ކަންނެލި މަސްވެރިން ފެށި އިހުތިޖާޖު ނިންމާލައިފި އެވެ.
ބޮޑުކަންނެލި މަސްވެރިންގެ ޔޫނިއަން އިން އިންތިޒާމުކޮށްގެން ހުޅުމާލެ ކަންނެލި ޖެޓީ ސަރަހައްދުގައި މި އިހުތިޖާޖު ފެށީ އިއްޔެ ހެނދުނު އެވެ. މި އިހުތިޖާޖު ރޭގެ ނިޔަލަށް ކުރިއަށް ގެންގޮސްފައިވެ އެވެ.
ބޮޑު ކަންނެލި މަސްވެރިންގެ ޔޫނިއަނުން ބުނީ އިހުތިޖާޖު ނިންމާލީ ކަންނެލި މަސްވެރިކަމަށް ލޭނު އެޅުމަށް ހުއްދަ ނުދޭނެ ކަމަށާއި އަދި އެއްގަމު ޝެޑްތަކުން ޑީސަލް ގަންނަން ލިބޭ އަގަށް ކަންނެލި މަސްވެރިންނަށް ޑީސަލް ގަންނަން ލިބޭނެ ކަމަށް ސަރުކާރާއި އެކު ކުރެވުނު މަޝްވަރާތަކުން އެއްބަސްވުމަކަށް އާދެވުމުން ކަމަށެވެ.
މަސްވެރިން ކުރަމުން އައި އިހުތިޖާޖު ނިންމާލިއިރު، ފިޝަރީޒް މިނިސްޓްރީން ވަނީ ރައީސް ޑރ. މުޙައްމަދު މުޢިއްޒު އިސް ނަންގަވައިގެން މަސްވެރިންނަށް ހުޅުމާލޭން ވިއްކާ ތެލުގެ އަގު ޝެޑްތަކުން ވިއްކާ އަގަށް ހެޔޮކޮށްފައިވާކަން ރޭ އިއުލާންކޮށްފަ އެވެ. މި އިންތިޒާމު ހަމަޖެއްސީ ސަރުކާރުގެ މެނިފެސްޓޯގައިވާ ވައުދު ފުއްދުމައްޓަކައި ކަމަށް ފިޝަރީޒް މިނިސްޓްރީން ބުނެ އެވެ.
