ކޮވިޑް-19ގެ ސަބަބުން މެދުކެނޑުމަށް ފަހު ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން މާލެ ސަރަހައްދަށް ހުޅުވާލައިގެން ކުރިއަށްގެންދާ ފުރަތަމަ ބެޑްމިންޓަން މުބާރާތް މިއަދު ފަށާނެ އެވެ.

ހެލްތު ޕްރޮޓެކްޝަން އެޖެންސީ (އެޗްޕިއޭ) އިން މާލެ ސަރަހައްދުގައި ކުޅިވަރު މުބާރާތްތައް ކުރިއަށްގެންދަން ދީފައިވާ ހުއްދައިގެ ދަށުން ބާއްވާ ބީއޭއެމް މިކްސް ޓީމު ޗެމްޕިއަަންޝިޕުގައި އަށް ޓީމެއް ވާދަކުރެ އެވެ. އެ ޓީމުތައް ވަނީ ދެ ގްރޫޕަކަށް ބަހާލައިފަ އެވެ. ހަފްތާއެއްހާ ދުވަހަށް ދިގު ދެމިގެންދާ މި މުބާރާތުގެ ފައިނަލް އޮންނާނީ އަންނަ ހަފްތާގެ އަންގާރަ ދުވަހު އެވެ.

ބީއޭއެމްގެ ރައީސް މޫސާ ނާޝިދު މީގެކުރިން ވިދާޅުވީ މި މަސް ތެރޭ ބެޑްމިންޓަން މުބާރާތެއް ބޭއްވުމަށް ގަސްދުކުރާ އެންމެ ބޮޑު އެއް ސަބަބަކީ މާލެ ސަރަހައްދުގައި ތިބި ކުޅުންތެރިންނަށް ކޮމްޕެޓިޓިވް މެޗުތަކެއް ހޯދައިދިނުމުގެ އިތުރުން ކުޅުންތެރިންގެ އެންމެ ފަހުގެ ހާލަތު ވަޒަންކޮށްލުމެވެ.

މުބާރާތުގެ ޓީމުތައް ގްރޫޕްތަކަށް ބެހިފައިވާ ގޮތަށް ބަލާއިރު، ގްރޫޕް އޭގައި އޮތީ އަޖުފާން އިންޓަނޭޝަނަލް ބެޑްމިންޓަން އެކެޑަމީ (އައިބާ)، ސައިރިކްސް ރެކްރިއޭޝަން ކްލަބް، ކްލަބް ސްޓެޓިކް އަދި އިންޑޯ ސްޕޯޓްސް ބެޑްމިންޓަން އެކެޑަމީ އެެވެ. ގްރޫޕް ބީގައި ހިމެނެނީ އެންމެ ފަހުގެ ފުރަތަމަ ޑިވިޝަން ޗެމްޕިއަން ރިވައިވަލް ސްޕޯޓްސް، ކްލަބް ސްކޯ ސްޕޯޓްސް، ޔުނައިޓެޑް ވިކްޓްރީ (ޔޫވީ) އަދި ދަ ގޯޅި ސްޕޯޓްސް ކްލަބް އެވެ. މުބާރާތުގެ މެޗުތައް ރޭވިފައިވާ ގޮތަށް ބަލާއިރު ކޮންމެ ދުވަހަކު ދެ މެޗެއް ކުޅޭނެ އެވެ. ކޮންމެ މެޗެއްގައި އަށް ގޭމް ހިމެނޭނެ އެވެ. އެއީ ތިން ފިރިހެން ޑަބަލްސް، ދެ މިކްސް ޑަބަލްސް އަދި ދެ އަންހެން ޑަބަލްސް އެވެ.

ބެޑްމިންޓަން އެސޯސިއޭޝަނުން މި އަހަރަށް ގިނަ ހަރަކާތްތަކެއް ރޭވި ނަމަވެސް ކޮވިޑް-19ގެ ސަބަބުން މާޗް މަހު ހުރިހާ ހަރަކާތެއް ހުއްޓާލަން ޖެހުނެވެ. އޭގެ ފަހުން މާލެ ސަރަހައްދުގައި މުބާރާތެއް ނުބޭއްވުނު ނަމަވެސް ބީއޭއެމްގެ އެހީތެރިކަމާ އެކު ބެޑްމިންޓަންގެ ފޯރި އޮންނަ އެކި ޒޯންތަކުގައި ވަނީ މުބާރާތްތައް ބާއްވައިފަ އެވެ.

ބެޑްމިންޓަން އެސޯސިއޭޝަނުން ބުނީ މުބާރާތުގެ ކަންތައްތައް ކުރިއަށްދާނީ އެޗްޕީއޭ އިން ކަނޑައަޅާފައިވާ ގައިޑްލައިނުގެ ތެރެއިން، ވީ އެންމެ ރައްކާތެރިކަމާ އެކުގައި ކަމަށެވެ.