މި މަހު ފަށާ ޔޫރޯ ފުޓްބޯޅަ މުބާރާތާ ގުޅިގެން ކުޑަކުދިންނަށް ހާއްސަކޮށްގެން ކުޑަކުދިންގެ ހަވީރެއް ބޭއްވުމަށް ހަމަޖައްސައިފިއެވެ.
"ޔޫފޯރިއާ"ގެ ނަމުގައި ބާއްވާ ކުޑަކުދިންގެ ހަވީރު އޮންނާނީ ހަވީރު 4:00 އިން 6:00 އަށް ހުޅުމާލެ ސެންޓްރަލް ޕާކުގައެވެ.
މި ހަވީރުގައި ކުޑަކުދިންނާ ގުޅޭ ގޭމުތަކާއި އިތުރު ޙަރަކާތްތަކާއި ތަފާތު އެކި ސްޓޯލްތައްވެސް ހުންނާނެއެވެ. އަދި ކުޑަކުދިންގެ ހަވީރު ޓީވީއެމްއިން ވަގުތުން ގެނެސްދިނުމަށްވެސް ވަނީ ހަމަޖެހިފައެވެ.
ޔޫރޯއާ ގުޅުވައިގެން ކުޑަކުދިންގެ ހަވީރެއް ބޭއްވުމަށް ހަމަޖައްސާފައިވާއިރު، ޔޫރޯއާއި ގުޅިގެން ޕީއެސްއެމުން ޚާއްސަ ކަވަރޭޖެއް ގެނެސްދިނުމަށްވެސް ވަނީ ތައްޔާރުވެފައެވެެ. އެގޮތުން މުބާރާތާއި ގުޅޭ ހުރިހާ މަޢުލޫމާތެއް ގެނެސްދިނުމަށް ޕީއެސްއެމުން ވަނީ "ޕީއެސްއެމް ފޯރި 2024″ ނަމުގައި ޚާއްސަ ކަވަރޭޖެއް ލޯންޗްކޮށްފައެވެ.
މިމަހުގެ 14 ވަނަ ދުވަހު ފަށާ ޔޫރޯގެ މެޗުތައް ލައިވްކޮށް، ފުރިހަމަ އެޗްޑީ ކޮލިޓީގައި ބެލުންތެރިންނަށް ގެނެސްދިނުމަށް ރާއްޖޭގައި ރައިޓްސް އޮތް ހަމައެކަނި ފަރާތަކީ މިފަހަރު ޕީއެސްއެމްއެވެ.
