ތިން މަރުހަލާއަކަށް ބަހާލައިގެން، ޣައްޒާގައި އިސްރާއީލުން ކުރިޔަށް ގެންދާ ހަނގުރާމަ ބައިޑަން ހުށަހެޅިގޮތަށް އެއްބަސް ނުވާކަން ހާމަކޮށް އިސްރާއީލުން ވާހަކަ ދައްކައިފިއެވެ.
ބައިޑަން ހުށަހަޅާފައިވާ ސުލްހައިގެން ހުށަހެޅުގައިވާގޮތުން އެ ހުށަހެޅުމުގެ ފުރަތަމަ މަރުހަލާ ހަ ހަފުތާއަށް ދެމިގެންދާނެ ކަމަށާއި އޭގެ ތެރޭގައި "ޣައްޒާގެ އާބާދީ ބޮޑު ހުރިހާ ސަރަހައްދަކުން އިސްރާއީލު ސިފައިން ފޭބުން" އަދި ފަލަސްތީނުގެ އެތައް ސަތޭކަ ގައިދީން މިނިވަން ކުރުމުގެ ބަދަލުގައި ހަމާސްއިން ރަހީނު ކޮށްފައިވާ މީހުންގެ ތެރެއިން، އަންހެނުންނާއި އުމުރުން ދުވަސްވީ މީހުންނާއި ޒަހަމްވި މީހުން ހިމެނޭ ގޮތަށް ގިނަ އަދަދެއްގެ މީހުން ދޫކޮށްލުން ހިމެނެއެވެ.
އަދި ދެވަނަ ފިޔަވަހީގެ ދަށުން "ފިރިހެން ސިފައިން ހިމެނޭ ގޮތަށް ދިރިތިބި ހުރިހާ ރަހީނުން ދޫކޮށްލުމުގެ" ފުރުސަތު ލިބިގެންދާނެ ކަމަށް ބައިޑްން ވަނީ ވިދާޅުވެފައެވެ. އަދި ހަމާސް އިން ވެފައިވާ ވައުދުތައް ފުއްދައިދޭހާ ހިނދަކު، ވަގުތީ ހަނގުރާމަ ހުއްޓާލުމަކީ، އިސްރާއީލުގެ ހުށަހެޅުންތަކުގެ ބަހުން ބުނާނަމަ، "ހަނގުރާމަ ދާއިމީކޮށް ހުއްޓާލުން" ކަމަށް ބައިޑަން ވިދާޅުވި އެވެ.
އަދި ތިންވަނަ ފިޔަވަހީގައި ޣައްޒާގެ އަލުން އާރާސްތުކުރުމުގެ ބޮޑު ޕްލޭނެއް ފަށާނެ ކަމަށާއި، މަރުވެފައިވާ މީހުންގެ ހަށިތައް އެމީހުންގެ އާއިލާތަކަށް އަނބުރާ ލިބިދެވޭނެ ކަމަށްވެސް ރައީސް ބައިޑްން ވިދާޅުވި އެވެ.
މި ހުށަހެޅުމާއި ގުޅޭގޮތުން ހަމާސްއިން ބުނެފައި ވަނީ ހުށަހެޅުމުގައި ބަޔާންކޮށްފައިވާ ކަންތައްތަކާ މެދު އެ ޖަމާއަތުން "އީޖާބީކޮށް ދެކޭ" ކަމަށާއި ހަނގުރާމަ ހުއްޓާލުމާއި ރަހީނުން ދޫކޮށްލުމުގެ ކޮންމެ ޕްލޭނަކަށް ބިނާކުރަނިވި ގޮތެއްގައި ރައްދު ދޭނެ ކަމަށެވެ.
ބައިޑަން އެ ހުށަހެޅުން ތަފްސީލުކޮށް ދެއްވުމާ އެކު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ނެރުއްވި ބަޔާނެއްގައި ވިދާޅުވީ ހަމާސް ބަލިކޮށްގެން ނޫނީ އެ ގައުމުން ހަނގުރާމަ ހުއްޓާނުލާނެ ކަމަށެވެ. އަދި އެމީހުންގެ ހުށަހެޅުންތަކުގެ ސަބަބުން އިސްރާއީލަށް އެ އުސޫލުތައް ދެމެހެއްޓުމުގެ ފުރުސަތު ލިބިގެންދާ ކަމަށް ނަތަންޔާހޫގެ އޮފީހުން ބުންޏެވެ.
އަދި ހޮނިހިރު ދުވަހުވެސް އިސްރާއީލުގެ ބޮޑުވަޒީރު ވަނީ މި ސްޓޭންޑް ތަކުރާރުކުރައްވައި، ހަނގުރާމައިގައި އިސްރާއީލުން ކަނޑައަޅާފައިވާ ލަނޑުދަނޑިތަކަށް "ބަދަލެއް ނާންނަ" ކަމަށް ވިދާޅުވެފައެވެ. ބައިޑަންގެ ހުށަހެޅުމާއި ފުށުއަރާ ފަދަ ވާހަކަތަކެއް އިސްރާއީލުން ދެއްކިއިރު، އެމެރިކާގެ ރައީސް ވިދާޅުވި ގޮތަށް އިޒްރޭލުން އެ ހުށަހެޅުމަށް ތާއީދު ކުރާކަމާ މެދު ވަނީ ޝައްކު އުފެދިފަ އެވެ.
