ވިހި ވަނަ ރައްޔިތުންގެ މަޖިލިހުގެ ހުވާ ކުރެއްވި މެމްބަރުން ރައްޔިތުންގެ ކުރިއެރުމަށް ގިނަ މަސައްކަތްތަކެއް ކުރައްވާނެ ކަމުގެ އުންމީދު އެބައޮތް ކަމުގައި ކުރީގެ ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެއެވެ.
އާ މެމްބަރުން ހުވާ ކުރެއްވުމާ ގުޅިގެން ސޯލިހް "އެކްސް" ގައި ކުރެއްވި ޕޯސްޓެއްގައި ވިދާޅުވީ 20 ވަނަ މަޖިލިހަށް ހޮވިވަޑައިގެން މިއަދު މަގާމުގެ ހުވާ ކުރެއްވި ހުރިހާ މެމްބަރުންނަށް މުބާރިކްބާދީ އާއި ތަހުނިޔާ އަރިސް ކުރައްވާ ކަމަށެވެ.
https://x.com/ibusolih/status/1795320839363043333
އަދި މެމްބަރުންނަށް ރައްޔިތުން ހަވާލު ކުރެއްވި މުހިއްމު ވާޖިބު އެންމެ ފުރިހަމަ އަށް އަދާކުރައްވައި ގާނޫނުއަސާސީ އާއި ޑިމޮކްރަސީގެ ރިވެތި އުސޫލުތަކުގެ މަތީގައި ދެމިތިއްބަވައި ގައުމަށާއި ރައްޔިތުންގެ ކުރިއެރުމަށް ގިނަ މަސައްކަތްތަކެއް ކޮށްދެއްވާނެ ކަމަށް އުންމީދު ކުރައްވާ ކަމުގައި ސޯލިހް ވިދާޅުވިއެވެ.
ވިހި ވަނަ މަޖިލިހުގައި 93 މެމްބަރުން ހިމެނިވަޑައިގަންނަވާ އިރު، އެ ހުރިހާ މެމްބަރުން ވެސް މިއަދު ހަވީ ހުވާ ކުރައްވައިފައެވެ. އަދި ހުވާ ކުރެއްވުމަށް ފަހުގައި ހުވާގައި ސޮއިކުރައްވާފައިވެއެވެ.
ރައްޔިތުންގެ މަޖިލިހުގެ އިދާރާގައި މިއަދު ހެނދުނު 9:00ގައި ބޭއްވި ހާއްސަ ރަސްމިއްޔާތެއްގައި އެ މެމްބަރުންނަށް ހުވާ ލައިދެއްވީ އުއްތަމަ ފަނޑިޔާރު އަހުމަދު މުއުތަސިމް އަދުނާނެވެ.
މިދިޔަ މަހުގެ 21 ވަނަ ދުވަހު ބޭއްވި މަޖިލިހުގެ އިންތިހާބުގައި ޕީއެންސީން ވަނީ 66 ގޮނޑި ކާމިޔާބުކޮށްފައެވެ. އޭގެ ފަހުން އަމިއްލަ ގޮތުން އިންތިހާބު ވެވަޑައިގެންނެވި ނުވަ މެމްބަރަކު ޕީއެންސީއާ ގުޅިވަޑައިގަތުމުން އެ ޕާޓީގެ މެމްބަރުންގެ އަދަދު ވަނީ 75 އަށް އަރައިފައެވެ. މަޖިލިހުގައި ދެން ތިއްބަވަނީ އެމްޑީޕީގެ 12 މެމްބަރުންނާއި އެމްޑީއޭގެ ދެ މެމްބަރުންނާއި ޖުމްހޫރީ ޕާޓީގެ މެމްބަރަކާއި އެމްއެންޕީގެ މެމްބަރަކާއި އަމިއްލަ ގޮތުން އިންތިހާބުވެވަޑައިގެންނެވި ދެ މެމްބަރެކެވެ.
