ބައިނަލްއަގުވާމީ ނިޒާމުތަކަށް އަޅުގަނޑުމެން ކުރާ އިތުބާރާއި އުއްމީދުތައް ވަނީ ގެއްލެން ފަށާފައިވާ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ ތަރުވަނަ "އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް" މަހާސިންތާ ހުޅުވުމުގެ ރަސްމިއްޔާތުގައި ރާއްޖޭގެ ފަރާތުން ބަޔާން އިއްވަވަމުންނެވެ.
ރައީސްގެ ބަޔާނުގައި ވިދާޅުވީ ބާބެޑޯސްގައި 1994 ވަނަ އަހަރު ބޭއްވި ސިޑްސް ސަމިޓުގައި އެކުލަވާލި ފުރަތަމަ ސިޑްސް މަގުޗާޓަށް މިއަދު 30 އަހަރު ވެފައިވާ ކަމަށެވެ. އަދި މިހާރު ތައްޔާރުވަމުންދަނީ ސިޑްސްގެ ހަތަރުވަނަ މަގު ޗާޓު އެކުލަވާލުމަށް ކަމަށް ރައީސް ވިދާޅުވިއެވެ. ފާއިތުވި 30 އަހަރުގެ ތެރޭގައި ސިޑްސްއަށް ހާސިލުކުރެވެނު ކަންތައްތަކަކީ ކޮބައިތޯ މިއަދު ބަލައިލުން ކޮންމެހެން ވެސް މުހިންމު ކަމަށް ރައީސް ވިދާޅުވިއެވެ.
ރައީސް ވިދާޅުވީ ސިޑްސްގެ ގައުމުތަކުގައި ފަގީރުކަން އެބައޮތް ކަމަށާއި މޫސުމީ ބަދަލުގެ ނުރައްކާ އިންތިހާއަށް ބޮޑުވެ، ގުދުރަތީ މާހައުލުތައް ދަނީ މަރުވަމުން ކަމަށެވެ. އަދި ދަރަނިތައް ދަނީ މަތިވަމުން ކަމަށާއި ބޭއިންސާފައި ނާއިންސާފު ފެތުރެމުންދާ ކަމަށެވެ.
"އަޅުގަނޑުގެ ޒަމީރު ގަބޫލުކުރަނީ މި ވާހަކަ ދައްކަން، އެ ވާހަކައަކީ މިއީ ސިޑްސްއިން އަމިއްލަ ގާބިލިއްޔަތުކަމުގެ ބާރުގައި ތަރައްގީ ގެންނަން މަސައްކަތް ކުރަންވީ ވަގުތުކަން. އަޅުގަނޑުމެންގެ ނާޒުކު ކަމަކީ އަޅުގަނޑުމެންގެ ހަލާކަށް ވެގެން ނުވާނެ. އެއީ އަޅުގަނޑުމެންނަށް ލިބިފައިވާ ބާރަކަށް ހަދަންޖެހޭ. ހަމަ މި ފުރުސަތުގައި ބައިނަލްއަގުވާމީ މުޖުތަމައަށް ގޮވާލަން އަޅުގަނޑުމެންގެ މައްޗަށް ބާރު ނުހިންގައި އެހީވެދިނުމަށް،" ރައީސް ވިދާޅުވިއެވެ.
"ބައިނަލްއަގުވާމީ ނިޒާމުތަކަށް އަޅުގަނޑުމެން ކުރާ އިތުބާރާއި އުއްމީދުތައް ގެއްލެން ފަށައިފި،" ރައީސް މުއިއްޒު ވިދާޅުވިއެވެ.
ސިޑްސްގެ ގައުމުތަކަށް ބައިނަލްއަގުވާމީ މުޖުތަމައުން މާލީ އެހީތެރިކަން ފޯރުކޮށްދިނުން އިތުރުކޮށްދޭން ޖެހޭ ކަމަށް ރައީސް ވިދާޅުވިއެވެ. އެގޮތުން ސިޑްސްގެ ގައުމުތަކަށް ލޯނު ދިނުމުގައި ލުއި ގޮތްތައް ހަމަޖައްސައިދީ އިގުތިސާދީ ލޮޅުންތައް އަންނަ ވަގުތުތަކުގައި ރިޓްރެކްޓިވް ފައިނޭންސިން ހިމެނޭ ގޮތަށް އިތުރު އީޖާދީ ހައްލުތަކެއް ލިބޭނެ ނިޒާމުތަކެއް ގާއިމުކުރަން ޖެހޭ ކަމަށް އެ މަނިކުފާނު ވިދާޅުވިއެވެ.
ޕްރައިވެޓް ކްރެޑިޓް ލެންޑާތަކުން ސަރުކާރުތަކަށް ލޯނު ދޫކުރުމުގައި ވެސް ލުއިގޮތްތަކެއް ހަމަޖައްސައިދޭން ޖެހޭ ކަމަށް ރައީސް ވިދާޅުވިއެވެ.
"ބައިނަލްއަގުވާމީ ކްލައިމެޓް ފަންޑުތަކާއެކު އަޅުގަނޑުމެންނަށް ކުރެވިފައިވާ ތަޖުރިބާއަކީ، މި ގައުމުތަކަށް ކުރިމަތިވާ ގޮންޖެހުންތަކާ ކުރިމަތިލުމަށް އެއީ އެކަށީގެންވާ ވަރުގެ ފަންޑުތަކެއް ނޫންކަން،" ރައީސް ވިދާޅުވިއެވެ.
މޫސުމީ ބަދަލުތަކުން އަރައިގަތުމަށް ކުރަން ޖެހިފައިވާ މަސައްކަތާ އަޅައިބަލާއިރު އެފަދަ ފަންޑުތައް ވަނީ ފެއިލްވެފައި ކަމަށް ރައީސް ވިދާޅުވިއެވެ.
